Siglir tar il cuntegn

Grischun Central Albula/Alvra tschertga in nov lieu per l’administraziun

La vischnanca Albula/Alvra ch’è ida en vigur l’entschatta dal 2015 è a la tschertga d’in nov lieu per l’administraziun. Quai ha confermà Daniel Albertin, il president communal.

Il bajetg da la posta a Casti cun vista sin il tancadi vis a vis.
Legenda: Il bajetg actual da la Posta pudess en l'avegnir vegnir remplazzà entras ina nova administraziun. RTR, F. Belotti

Gia tar las tractativas da fusiun era quai cler che las localitads da l’administraziun communala dasperas la baselgia da Casti duessan esser mo ina soluziun temporara, ha ditg Daniel Albertin.

La chasa cun l'administraziun da la vischnanca Albula/Alvra.
Legenda: La chanzlia da la vischnanca Albula/Alvra è il mument mo cuntanschibla sur ina via taissa. RTR, F.Belotti

Las localitads actualas sajan mo per part adattadas. Uschia manchia per exempel in salv per sedutas surregiunalas, e la chanzlia communala saja da cuntanscher sur ina via taissa mo adattada per persunas fittas. Ins haja laschà far in studi, co che l’avegnir pudess vesair ora. Tenor il president communal da la vischnanca Albula/Alvra èsi l’idea, da far l’administraziun en il bajetg da la posta a la staziun. Anc quest onn duess vegnir scritta or ina concurrenza.