Siglir tar il cuntegn

Header

cuntegn

Grischun Central 52 persunas visitan curs da rumantsch a Savognin

Mintg’onn porscha Savognin Turissem curs da stad da rumantsch. Quest onn èn s’inscrittas 52 persunas per ils curs dals differents livels, ha ditg la scolasta Zegna Pittet-Dosch. Quai saja en il rom dals auters onns. Ils curs cuzzan dals 15 fin ils 26 da fanadur.

10 persunas visitan actualmain il curs da repetiziun e conversaziun. Raschuns per emprender rumantsch datti diversas. Elisabeth Schwarz da Cuira per exempel ha plaschair vi da linguas. Ella è da l’avis, ch’ins stoppia chapir in zic da la quarta lingua naziunala Svizra. Per il surmiran è ella sa decidida perquai ch’in ami da l’Engiadina ha ditg ad ella ch’il Surmiran saja il pli bel idiom rumantsch, tge ch'ella conferma.

Annalies Steiger da Langnau am Albis è pensiunada, e viva ussa per part era en il Surses. Per pudair communitgar meglier cun sia parentella en il Surses, fa ella il curs da stad da rumantsch. Ella visita dentant era regularmain ulteriurs curs da surmiran.

audio
Bunura: Curs da rumantsch Savognin – I dat diversas raschuns per sa participar
ord Actualitad dals 17.07.2019.
laschar ir. Durada: 3 minutas 28 Secundas.

Famiglia en il Surses

Irene Amsler da l’Argovia ha medemamain parents en il Surses, uschia visita ella gia dapi divers onns ils curs da stad da rumantsch a Savognin. Ma betg mo en il Surses dovria ella il rumantsch: Regularmain s’inscuntria ella cun amias dal curs da stad giu en la bassa tar café e turta, nua ch’i discuteschan per rumantsch e legian era ina giada in text en rumantsch, ha ella ditg.

Era Peter Kaufmann ch’è emigrada dal chantun Turitg a Mon avant nov onns, fa il curs da rumantsch. Cun emprender rumantsch possia el s’identifitgar meglier cun la cultura indigena, ha el ditg.

RR actualitad 07:00

Artitgels legids il pli savens