Siglir tar il cuntegn
cuntegn

Grischun Central 300 skiunz al di a San Bernardino

Il territori da skis da la San Bernardino Impianti Turistici SA (SBIT) ch’è stà serrà durant quatter onns, è puspè avert dapi Nadal. En media han radund 300 persunas a di visità il territori da skis. Ils gestiunaris fan ina bilantscha positiva.

Impressiuns dal territori da skis da San Bernardino da questa stagiun d'enviern.
Legenda: Impressiuns dal territori da skis da San Bernardino da questa stagiun d'enviern. SBIT

Sco quai che Franco Ghezzi, commember dal cussegl d’administraziun da la SBIT ha ditg envers RTR, ins saja fitg cuntent cun las frequenzas dals dis da festa. Vi dals implants tecnics n’haja quai enfin oz dà nagins incaps. Ins haja era ils davos quatter onns cura ch’ils implants na cursavan betg adina fatg las revisiuns necessarias.

Sco gia la stad passada, duai la pendiculara era la proxima stad puspè cursar, ed era l’autra stagiun d’enviern duai il territori da skis puspè avrir, uschia Franco Ghezzi. Ils implants da sport da San Bernardino èn averts enfin Pasqua, durant emnas pli flaivlas datti mo in manaschi las fins d’emna.

RR actualitad 07:00