Siglir tar il cuntegn
Inhalt

Grischun Central 30 abitaziuns novas per seniors a Savognin

Raphael Zuber gudogna la concurrenza «Abitar cun service» dal Center da Sanadad Savognin SA. A Cunter èn vegnids preschentads il venderdi saira tut ils projects ch’èn vegnids inoltrads.

Il project «Abitar cun service» vul porscher spazi da viver a persunas pli veglias ch’èn anc ablas da viver senza agid. Igl è previs, ch’ils cussedents pon far diever da purschidas dal spital e da la chasa d’attempads, per exempel ir a gentar, laschar nettegiar l’abitaziun u dar la glischiva per lavar. Las abitaziuns per seniors vegnan colliadas cun in tunnel cun il spital e la chasa d’attempads.

Mo architects dal Grischun

A la concurrenza èn sa participads otg architects dal Grischun, da quels èn trais stads dal Surses. Il project dal victur da la concurrenza prevesa la construcziun da duas chasas cun total 30 abitaziuns. «Il project ha persvadì nus cun quai ch’igl è in project fitg effizient, partì en fitg bain e fatg il maximum ord las pussaivladads ch’èn avant maun», ha ditg Clemens Poltera, il president dal cussegl d’administraziun dal spital Savognin cun chasa d’attempads. Ils ulteriurs participants da la concurrenza èn stads Maurus Mareischen da Savognin (en collavuraziun cun Maurus Frei, architect da Cuira), Nüesch + Partner Tinizong, Uffer SA Savognin, Men Duri Arquint da Cuira, Angela Deuber da Cuira, Hagmann/Jüngling da Cuira e Horvath Pablo da Cuira.