Siglir tar il cuntegn

Grischun Central 230 suttascripziuns cunter lescha da rument Surses

Cunter la nova lescha da rument da la vischnanca Surses datti opposiziun. Radund 230 persunas han suttascrit ina brev d’ina gruppa d’interess che pretenda midadas vi da la lescha.

L'anteriura deponia da rument a Riom.
Legenda: Il matg è tranter auter la populaziun da Riom vegnida infurmada, che la deponia saja vegnida serrada. RTR, F. Belotti

Sco quai che la gruppa d’interess scriva a la suprastanza communala da Surses, saja il giavisch d’almain puspè pudair deponer gasettas e chartun en las deponias existentas en las fracziuns. Plinavant avessi d’esser pussibel da dismetter il rument verd da moda pli flexibla, per exempel cun ina bena en mintga fracziun.

Il president communal da Surses Leo Thomann ha survegnì bleras reclamaziuns pertutgant la nova lescha da rument.
Legenda: Il president communal da Surses Leo Thomann ha survegnì bleras reclamaziuns pertutgant la nova lescha da rument. RTR, F. Belotti

Leo Thomann, il president communal da Surses conferma, d’avair survegnì las suttascripziuns da la gruppa d’interess. Per part ha el chapientscha per la critica. Bleras reclamaziuns na sajan però betg fundadas. Ins vegnia ad examinar la situaziun, midadas sajan pussaivlas. Per exempel fissi pussaivel, d'adattar las uras d'avertura sin las deponias da Beiva e Savognin. Reactivar deponias serradas na veglian ins dentant betg, perquai ch'ins na veglia betg deponias cun chaos, perquai ch'i manchia il persunal.

RR actualitad 07:00