Siglir tar il cuntegn
Inhalt

Grischun Central 2'750 kilometers a pe: Dal Surses fin en Spagna

Claudio Föhn è chaminà da sia chasa paterna a Rona fin a Finisterre. Il viadi da pelegrinadi ha cuzzà tschintg mais, enavos è el vegnì cun bleras bellas regurdientschas. La fin d'emna ha'l raquintà en La Scuntrada a Tinizong da sias aventuras.

154 dis ha durà il viadi che Claudio Föhn ha cumenzà l’atun da l’onn passà. Cler, el avess er pudì ir pli spert, ma el leva prender temp per il viadi.

Viadi en tutta calma tar lieus impressiunants

Cura ch’in lieu plascheva ad el steva el magari er in per dis al medem lieu. El saja vegnì en blers lieus fascinants, sco per exempel en lieus dal temp medieval nua ch’i pareva, ch’il temp saja stà salda.

Impressiunants sajan natiralmain era stadas las citads da pelegrinadi Lourdes e Santiago de Compostela.

Claudio Föhn: Cun ir a pe ves'ins la cuntrada cun auters egls

La ruta da Claudio Föhn.
Legenda: La ruta da Claudio Föhn. Grafica - RTR

Radund duas giadas haja el stuì midar ils chalzers cun quai ch’els eran isads. L’emprima mesadad da ses viadi ha el entupà quasi nagins auters pelegrins, cun quai che pacs fetschian in tal viadi durant l’enviern.

Grazia ad in enviern flaivel na sajan la naiv e las fradaglias betg stà in problem per el. La segunda mesadad da ses viadi ha'l fatg en gruppa, quai cun persunas ch’el ha entupà sin ses viadi. Durant in’emna è el er vegnì accumpagnà da sia amia.

Cuntrasts davart il viadi a Santiago de Compostela da Roman Weisshaupt