L'istorgia dad Origen ha atgnamain cummenzà gia l’onn 2005, cura che Giovanni Netzer ha inscenà en la baselgia Son Martegn il oratori Apocalipsa da Gion Antoni Derungs. Cun quella producziun è naschida l’idea d’in festival da teater professiunal.
12 onns in act da ballantscha
Ils davos 12 onns saja il festival Origen stà in act da ballantscha, di Giovanni Netzer. In ballantschar tranter risico e saun giudizi. Ina gronda sfida, ch’el haja dumagnà fin ussa cun blera passiun ed era cletg. Cletg per exempel da survegnir in u l’auter premi, che haja gidà il festival sin sia via. Origen haja uss suenter sai ils onns d’uffanza e stettia avant la pubertad.
Ils proxims onns stoppia vegnir decidì da bleras dumondas, uschia er da novas structuras e collavuraturs. Quellas respostas decidian lura sur da l’avegnir dal festival, sche quel possia propi daventar ina ferma instituziun en la regiun u sche quai saja stà in experiment artistic ad in temp limità.
