Siglir tar il cuntegn

Header

Navigaziun

Emprima radunanza communala da Surses, vista en la sala polivalenta da Savognin.
Legenda: Radund 150 persunas han visità l'emprima radunanza communala da la nova vischnanca Surses. RTR, F. Belotti
cuntegn

Grischun Central 110’000 francs paja annuala per il president communal da Surses

L’emprima radunanza communala da la nova vischnanca Surses, ha approvà glindesdi saira a Savognin la nova constituziun cun intginas midadas, quai per mauns da l’urna dals 16 d’avust. Plinavant èn vegnidas approvadas las leschas da votaziun ed elecziun, sco era la lescha d’indemnisaziuns.

Tar la lescha d’indemnisaziun, hai dà ina midada pli gronda. Il suveran ha acceptà la proposta da l’Uniun da mastirants Surses, ch’ha proponì d’augmentar la paja dal president communal da 80’000 sin 110’000 francs ad onn per l’emprima perioda d’uffizi da quatter onns. Davent dals 01.01.2020 dua la paja vegnir reducida sin 80’000 francs ad onn, sco proponì da la suprastanza transitorica da Surses. L’Uniun da mastirants Surses fa valair, ch’ils emprims onns suenter la fusiun dettia quai fitg blera lavur per il nov president communal. Il vice-president communal vegn indemnisà cun 20’000 francs ed ils suprastants mintgamai cun 15’000 francs ad onn.

Rumantsch dat da discutar

Per discussiuns ha procurà il diever dal rumantsch a la radunanza communala. Adina puspè han votantas e votants da Bivio intervegnì, ch’els na chapeschian betg il rumantsch, e ch’i fiss meglier da manar la radunanza communala en tudestg. La suprastanza transitorica n’ha dentant betg sa laschar embrugliar ed ha manà ina gronda part da la radunanza communala en rumantsch, la lingua uffiziala da la nova vischnanca Surses. Sche tut va tenor plan, va quella en vigur l’emprim da schaner 2016.