10 onns «Cube» – ma anc senza gudogn

Il hotel Cube a Savognin festivescha quest enviern ses giubileum da diesch onns. Il december 2005 è il hotel vegnì avert. Gudogn n’ha el anc fatg nagin.

Il hotel Cube a Savognin

Legenda da maletgs: Il hotel Cube a Savognin na duess betg restar il sulet Cube en Svizra, il Cube vul expander vinavant en Svizra. RTR, F. Belotti

Il directur dal hotel Cube a Savognin Rudolf Tucek conceda, d’avair gudagnà nagut enfin oz: «La nossa contribuziun per la hotellaria è stada quella, d’avair impedì il mender. Il pretsch persuenter è però, d’avair gudagnà anc nagut enfin oz», tira el bilantscha davar ils davos diesch onns.

Vegnì davent cun egl blau

Mo tuttina: sco quai che Tucek di envers RTR, sajan ins vegnì davent cun in egl blau. Entant che las pernottaziuns da la destinaziun da Savognin sajan sa reducidas dal 2007 fin oz da 95’142 sin 42’966, haja il Cube a Savognin pudì augmentar las pernottaziuns da 32% sin 45% en questa perioda.

Speranza sin il project «Viols»

Per avair in bun futur saja però indispensabel, d’avair ulteriuras capacitads. Mo cun 87 chombras daventia quai grev. Tucek ha gronda speranza ch’il project da hotel, bogn ed abitaziuns da vacanzas «Viols» po vegnir realisà cunquai ch’il Cube duess surpigliar quest manaschi.

Planisà ulteriurs hotels

Sco quai che Tucek ha ditg, duai plinavant dar ulteriurs hotels da Cube en Svizra. In da quels è per exempel planisà ad Anzère en il Vallais.