Siglir tar il cuntegn

Grischun Central 10’000 plantas per Bravuogn

Helvetia Assicuranzas sustegna la regiuvinaziun dal guaud da protecziun en Val d'Alvra e regala 10'000 plantas. Il guaud protegia tranter auter la lingia da l'Alvra da la Viafier retica. Oz èn las emprimas plantas vegnidas plantadas.

Legende: Video 10’000 plantas per Bravuogn abspielen. Laufzeit 01:24 Minuten.
Or da sil punct dals 12.08.2016.

Il president dal cussegl d'administraziun da la Viafier retica, Stefan Engler, il cusseglier guvernativ Mario Cavigelli ed il commember da la direcziun da Helvetia Svizra, Ralph Jeitziner han plantà las emprimas plantas giuvnas. Quai han els fatg ensemen cun ils dus ambassadurs da Helvetia per il guaud da protecziun, LizAn Kuster e Dario Cologna.

Per pussibilitar als passagiers in viadi segir, èn la Viafier retica ed il chantun Grischun dependents da guauds da protecziun intacts. Helvetia Assicuranzas sustegna perquai il chantun Grischun e la Viafier retica en la plantaziun dal guaud da protecziun en Val d'Alvra e regala 10'000 plantas.

La protecziun cunter privels da la natira è oz la prestaziun la pli impurtanta dal guaud grischun.
Autur: Mario Cavigellicusseglier guvernativ

Guaud da protecziun daventa pli impurtant

Var dus terzs dal guaud en il chantun Grischun protegian umans, infrastructuras, l'economia ed abitadis cunter privels da la natira. En la vischnanca da Bravuogn han bunamain 80% da la surfatscha da guaud da totalmain 3'000 ha ina funcziun da protecziun. Cunquai che l'effect da protecziun dependa fitg dal stadi dal guaud, sto quel vegnir tgirà cuntinuadamain.

En il chantun Grischun dattan ins oravant tut paisa a la regiuvinaziun, damai che las plantas creschan mo plaun en las autezzas. Per il chantun e per la vischnanca è la tgira dals guauds da protecziun ina sfida adina pli gronda. Sco consequenza da la mobilitad creschenta, da l'utilisaziun dal terren pli intensiva e da la midada dal clima crescha il potenzial da donns.

Sco gia ils piuniers che han construì avant passa 100 onns la lingia da viafier spectaculara tranter Tusaun e San Murezzan, ston oz ils selviculturs far lavur grondiusa per pudair garantir vinavant la segirezza. Il cusseglier guvernativ Mario Cavigelli constatescha: «La protecziun cunter privels da la natira è oz la prestaziun la pli impurtanta dal guaud grischun.»

Protecziun per generaziuns vegnintas

Grazia al 11avel project en favur dal guaud da protecziun da Helvetia Assicuranzas pon ins vinavant regiuvinar sistematicamain ils guauds ed uschia er meglierà l'effect da protecziun per generaziuns vegnintas. Felix Hunger da l'agentura generala Helvetia Cuira sa legra: «Cun noss engaschament per il guaud da protecziun contribuin nus activamain ad evitar donns da persunas e donns materials chaschunads d'eveniments da la natira.»

Ralph Jeitziner, manader vendita e commember da la direcziun da Helvetia Svizra, vesa parallelas tranter il guaud da protecziun e la fatschenta d'assicuranzas: «Sco en nossa fatschenta ston ins er en connex cun in guaud da protecziun planisar a lunga vista. I vegn a durar decennis, fin che las plantas novas vegnan a sviluppar lur effect da protecziun.»

Segirar il Patrimoni mundial da l'UNESCO

La VR enconuscha la rolla centrala dal guaud da protecziun. Ina viafier da muntogna è exposta pli fitg a privels da la natira ch'ina viafier en la planira. «La VR dispona d'in

ferm management da ristga en connex cun privels da la natira. Nus essan conscients quant impurtant ch'in guaud da protecziun intact è. In guaud da protecziun tgirà bain, po sminuir u schizunt evitar il privel da lavinas, crudadas da crappa e sbuvadas», declera Stefan Engler, il president dal cussegl d'administraziun da la VR e cusseglier dals chantuns dal chantun Grischun (PCD).

Nus essan conscients quant impurtant ch'in guaud da protecziun intact è.
Autur: Stefan Englerpresident cussegl d'administraziun VR

Prominenza plantan emprimas plantas

A chaschun da la preschentaziun da l'indeschavel project en favur dal guaud da protecziun ha Stefan Engler oz gist sez pudì vegnir activ. Ensemen cun ils represchentants da Helvetia, il schef dal Departament da construcziun, traffic e selvicultura dal chantun Grischun Mario Cavigelli, il selvicultur chantunal Reto Hefti, l'inschigner forestal regiunal Lukas Kobler, il selvicultur da revier Urs Fliri, il president communal da Bravuogn Peter Nicolay sco er il manader Infrastructura e vicedirectur da la VR Christian Florin ed ulteriuras persunalitads ha el plantà ils emprims pigns e lareschs.

Els èn vegnids sustegnids dals dus ambassadurs da Helvetia per il guaud da protecziun, la moderatura ed interprendidra LizAn Kuster ed il currider da passlung Dario Cologna.

Durant ils proxims 2-3 onns vegnan 10'000 pegns e lareschs plantads a Muot sur Bravuogn.
Legenda: Durant ils proxims 2-3 onns vegnan 10'000 pegns e lareschs plantads a Muot sur Bravuogn. RTR, F. Belotti

In'atgna planta per diesch francs

Tgi che vul sustegnair la plantaziun da guaud da protecziun, po cumprar per 10 francs in pass da plantas tar la Helvetia. Per mintga pass cumprà, vegn lura plantada in'ulteriura planta en in territori sustegnì - quai mintgamai sin ina parcella nudada spezialmain.

Sin la via da lain e la via d'aventuras da tren a Bravuogn pon ins ir a guardar las plantas novas directamain al lieu. Infurmaziuns en quel connex ed en connex cun ils diesch projects en favur dal guaud da protecziun da Helvetia en Svizra d'enfin qua e cun l'engaschament per il guaud da protecziun en ils pajais vischins èn disponiblas sin www.helvetia.ch/schutzwald., il link avra en ina nova fanestra