La situaziun da persunas che dumondan refugi en il Grischun sa calma per il mument in zic. Sper las 1'200 persunas ord l'Ucraina è la gronda part da las persunas che dumondan per asil en il Grischun da l'Iran, la Tirchia, la Sri Lanka e l'Afghanistan.
Tut tenor, nua ch'i dat in conflict – da là vegnan las persunas che dumondan per asil.
Durant ils onns da crisa en il Balcan sajan las cifras da persunas ch'han dumandà asil creschidas fermamain. Suenter sajan las dumondas d'asil idas enavos. Ussa cun il conflict en l'Ucraina sajan las cifras puspè creschidas.
Las pli grondas sfidas
La pli gronda sfida saja il grond dumber da persunas che sajan vegnidas en Svizra ed en il Grischun. I dovria alloschis, persunal d'assistenza e scolasts e scolastas, di Markus Haltiner da l'Uffizi da migraziun e dretg civil dal Grischun. La pli gronda sfida saja actualmain la scola, perquai ch'ina gronda part da las persunas che sajan arrivadas sajan uffants. Quels ch'han chattà suttetg en in alloschi collectiv dal chantun van là en scola. Per las scolas dals alloschis collectivs hajan ins chattà avunda scolasts e scolastas.
Scola per Ucranais a Cuira
En ils alloschis collectivs a Schiers, Trimmis ad a Tavau datti gia ina scola. La finamira da quellas scolas èsi da manar ils uffants sin in nivel ch'els possian suenter visitar la scola populara. A Cuira è vegnì stgaffì ina nova scola per ils alloschis collectivs «Cadonau» ed «Austrasse». La scola a Cuira saja spezialmain per uffants ucranais e porschia instrucziuns per tut las vegliadetgnas davent da la scoletta enfin las classas autas. Vitiers vegnan ils uffants ch'èn a Mustér ed a Laax.
La decisiun da far quai a Cuira saja stada evidenta: dad ina vart saja pli simpel da chattar persunas d'instrucziun, e da l'autra vart hajan ins suenter dapli pussaivladads per ils uffants da s'integrar en las scolas popularas. Tras quella centralisaziun hajan tschertas famiglias stuì vegnir transferidas en in alloschi collectiv a Cuira. Quai saja dentant stà nagin problem. Ils blers Ucrainais e las bleras Ucrainaisas vegnian da regiuns cun grondas citads, ed hajan plaschair da pudair vegnir a Cuira, nua ch'i hajan dapli pussaivladas. L'instrucziun dals 44 uffants e giuvenils da l'emprima fin la dieschavla classa ha cumenzà quest'emna. Per l'instrucziun ch'è organisada en blocs èn actualmain duas persunas d'instrucziun responsablas. L'instrucziun vegn tenor pussibilitads era cuntinuada durant las vacanzas da stad.
Planisaziun per ils fugitivs che vegnan anc
Suenter il maximum l'avrigl cun fin 200 persunas che sajan arrivadas saja la situaziun actuala sa calmada, di Markus Haltiner. La Confederaziun quintia dentant che 10'000 enfin 20'000 persunas pudessian vegnir en Svizra enfin il settember. Per il Grischun munta quai che 3'000 enfin 5'000 persunas pudessian vegnir. Per il mument dettia anc capacitads en ils alloschis collectivs dal chantun ed ins saja vi da stgaffir spazi supplementar.
Alloschis en il Grischun
L’Uffizi da migraziun e dretg civil dal Grischun ha 11 unitads d’alloschament – en tut 1'092 plazs. Vitier vegnan ulteriurs 100 plazs da reserva.
Actualmain èn 10 centers activs. Quai cun in’occupaziun da 52% (570 persunas).
1'839 persunas han chattà alloschi tar privats. Da quai èn 970 persunas ord l’Ucraina. Las ulteriuras 869 persunas vegnan da differents pajais sco l’Afganistan, Eritrea u Siria.