Siglir tar il cuntegn

Header

Navigaziun

Legenda: Guardar il video Flavio Bundi nov schefredactur da RTR. Durada 02:37 minutas.
Or da Telesguard dals 27.06.2017.
cuntegn

Grischun Flavio Bundi daventa nov schefredactur RTR

Flavio Bundi da Glion è il nov schefredactur da Radiotelevisiun Svizra Rumantscha. Il Sursilvan daventa a partir dal 1. da november 2017 successur da Gian Ramming. En sia nova funcziun responsescha el l’offerta da radio, televisiun ed online da RTR.

Il cussegl d’administraziun da la Societad svizra da radio e televisiun SRG SSR ha elegì Flavio Bundi (30) da Glion sco nov schefredactur RTR. L’elecziun è vegnida fatga sin proposta da la suprastanza da la societad purtadra SRG.R.

Sco dirigent e musicist passiunà sa Flavio Bundi co tractar armonias e dissonanzas.
Autur: Ladina HeimgartnerDirectura da RTR

Flavio Bundi è creschì si a Glion ed ha fatg la matura en il gimnasi da la Claustra da Mustér. Suenter quatter onns tar la Guardia svizra papala a Roma ha el studegià germanistica, politologia e sociologia a l’Universitad da Berna. Durant e suenter ses studi ha el lavurà sco collavuratur liber tar il «Bündner Tagblatt». En ses temp tar la Guardia svizra papala a Roma è el stà schef da persunal e responsabel per las medias. En il Grischun è Flavio Bundi bain enconuschent per sia lavur sco cumponist e dirigent. El dirigia il «Chor mischedau Suraua» e maina il chor «kontra.cant». Per ses engaschament musical ha el survegnì l’emna passada in premi da renconuschientscha dal chantun Grischun.

Cun sia moda e maniera frestga ed engaschada vegn el a purtar in nov vent en la chasa da medias rumantscha.
Autur: Oscar KnappPresident da la SRG.R

Flavio Bundi è vicemanader da fatschenta da la Federaziun svizra dal parlament dals giuvens (Dachverband Schweizer Jugendparlamente) e responsabel per il program «easyvote». «easyvote» infurmescha simpel, chapibel e neutral davart fatschentas che vegnan en votaziun. Il program ha la finamira da motivar giuvens e giuvnas votantas dad ir a l’urna.

La sensibilisaziun ed integraziun cumpetenta sco era l’approximitad al public èn elements centrals dal service public.
Autur: Flavio BundiNov schefredactur RTR

Flavio Bundi cumenza sia plazza il 1. da november 2017. Il schefredactur partent, Gian Ramming, resta commember da la direcziun RTR e surpiglia ed installescha la nova partiziun «svilup».

RR novitads 11:00