Siglir tar il cuntegn

Header

cuntegn

Zernez Ulteriurs 1,5 milliuns per amortisaziuns da la chasa da scola

La radunanza communala da Zernez ha approvà il quint dal 2021 che serrà cun in gudogn net da radund 653'000 francs. Quai tar entradas da passa 21 milliuns francs. Era ha la vischnanca da Zernez approvà da stgaffir ina prefinanziaziun dad 1,5 milliuns francs, quai per ils custs d'amortisaziun annuals da la chasa da scola, che muntan a radund 300'000 francs. Il project dad sanar ed engrondir la chasa da scola a Zernez, cun in credit da 9,798 milliuns francs, saja pli u main terminà, quai scriva la vischnanca. Gia ils onns 2018-2020 èn vegnidas fatgas reservas per ils custs d'amortisaziun futurs, uschia ch'il deposit total da la prefinanziaziun munta a 7,5 milliuns francs.

Premi d'energia 2020

La vischnanca da Zernez surdat mintg'onn in premis al patrun ch'ha fatg il pli bler per il clima l'onn passà cun sanaziuns energeticas u cun ses agir en general. Per l'onn 2021 èn quai las Ovras Electricas d'Engiadina SA. Cun l'investiziun e l'installaziun d'in indriz fotovoltaic sin il stabiliment d'ufficina haja l'interpresa fatg ina contribuziun per la protecziun dal clima e da l'avegnir da Zernez. Il premi è dotà cun 1'000 francs ed è in resultat dal premi da clima «Zürich Klimapreis Schweiz & Liechtenstein» che la vischnanca da Zernez ha survegnì 2014.

Ultim di per Emil Müller

Igl è stà la davosa radunanza communala ed era il davos di d'uffizi per il president communal partent, Emil Müller. El surpiglia il prim da zercladur il presidi communal dad Egnach (TG). Emil Müller è vegnì onurà per ses grond engaschament per la vischnanca da Susch e suenter la fusiun per la vischnanca da Zernez.

audio
Per tadlar: Las novitads da las 10:00
ord RTR Audio dals 26.05.2022.
laschar ir. Durada: 1 minuta 57 Secundas.

RTR novitads 10:00

Artitgels legids il pli savens