Joos Toutsch da Zernez sa regorda anc bain dals sforzs per realisar ina halla d’ingiant regiunala a Zernez. La finamira era da radunar tut ils purs da l’Engiadina, da la Val Müstair e da la Bregaglia per ch’els possian vender lur muaglia als martgadants.
Il 1996 è ella vegnida realisada. Ils emprims onns era quai in success, ma bainbaud vegnivan adina pli paucs purs cun la muaglia a Zernez. Il motiv è stà ch'ils purs han midà da vatgas da latg sin vatgas-mamma. A l’entschatta eran quai radund 1'000 bestgas che vegnivan vendidas e la fin mo pli 50.
La vendita da la halla na ha betg funcziunà, ed uschia ha la vischnanca da Zernez piglià a niz ella per agens basegns. Ussa vul la vischnanca vender la halla. Ella sto far lieu ad in nov implant da chalur sin distanza.
RR actualitad 08:00