Siglir tar il cuntegn
Inhalt

Engiadina Zernez – approvà plirs credits per vias d'access

La radunanza communala da Zernez ha approvà in credit d’investiziun brut da 550’000 francs per realisar in nov access a Gondas. Era ha la radunanza approvà in credit d'in mez milliuns francs per il sutpassadi da la Viafier retica da Champatsch.

La chasa communala da Zernez.
Legenda: La chasa communala da Zernez. RTR, Fabia Caduff

Il credit d'investiziun brut da 550'000 francs è per realisar in nov access a Gondas da las vias da guaud Güstizia/Clüs/Munt Baselgia a la via chantunala a Curtins/Suot Via. A la vischnanca restas alura la cumpart da 200'000 francs per construir quests access. Era ha la vischnanca concedì in mez milliun francs sco cumpart vida ils custs per la construcziun dal sutpassadi da la Viafier retica a Champatsch.

Lescha da chamonas vegn il fanadur (lügl) avant il pievel

La radunanza da vischnanca ha decis da laschar votar sur da la nova lescha communala da chamonas ils 30 da fanadur (lügl). Sco la suprastanza scriva en ina communicaziun è ella conscienta che questa lescha sveglia per part emoziuns.

La lescha da chamonas ha trais parts:

  • L'emprima part reglescha ils principis e las cumpetenzas per prender a fit ina chamona da la vischnanca. Era pon chamonas ch'èn adattadas per il diever turistic vegnir affittadas per quest intent.
  • Il segund punct reglescha alura il proceder d’affittanza. Qua èn definidas las premissas che l’affittader sto avair per ch'el po s'annunziar per prender a fit ina chamona.
  • En la terza part vegn alura reglada il cuntegn dals contracts d’affittanza che duajan vegnir fatgs per 8 onns.

Revisiun da la planisaziun locala

Vinavant propona la radunanza communala da Zernez da renviar la revisiun da la planisaziun locala. Quella era vegnida proponida en ina iniziativa inoltrada ils 30 da zercladur 2016. L'iniziativa pretenda che quai na dat nagins novs implants pli en vischnanca per explorar ni elavurar ni era betg per deponer material da fabrica en la vischnanca da Zernez. Il suveran da Zernez decida alura medemamain ils 30 da fanadur sur da la revisiun da la planisaziun locala.

RR novitads 06:00