Siglir tar il cuntegn
Inhalt

Engiadina WEKO sancziunescha firmas da construcziun

Differentas firmas da construcziun dal Grischun han tranter il 2008 ed il 2012 fatg giu tranter ellas tgi che survegn tge lavurs. Las interpresas èn vegnidas chastiadas da la cumissiun da concurrenza WEKO cun in milliun francs.

La WEKO sancziunescha pliras firmas da construcziun dal Grischun, quai pervia da las cunvegnas da pretschs ch'eran vegnidas a la glisch il 2012. Las 12 firmas duain avair fatg giu tranter ellas, tgi che survegn ils projects, quai tranter il 2008 ed il 2012.

Cunvegnientscha dal pretsch

La WEKO ha concludì sis inquisiziuns davart singulas cunvegnas da submissiun en l'Engiadina. I giaja per otg projects da construcziun auta e construcziun bassa cun ina summa da tranter 80'000 e sis milliuns francs. Tranter quels èn sis projects da privats, in project d'ina vischnanca engiadinaisa ed in dal chantun.

Las decisiuns sa drizzan vers las interpresas:

  • Bezzola Denoth AG (oz part da la Foffa Conrad AG)
  • Foffa Conrad AG
  • Implenia Schweiz AG
  • METTLER PRADER AG (oz part da la Zindel Gruppe AG)
  • ZINDEL GRUPPE AG
  • Crestageo AG (oz part da la Zindel Gruppe AG)
  • D. Martinelli AG
  • Lazzarini AG
  • Broggi Lenatti AG
  • P. Lenatti AG (Construcziun auta e bassa)
  • René Hohenegger Sarl
  • Nicol. Hartmann & Cie. SA

Las interpresas han manipulà las singulas acquisiziuns en differentas constellaziuns. Las 12 firmas ston quintar cun chastis da plirs millis fin 400'000 francs pro cunvegna. La sancziun totala da las sis inquisiziuns munta ad in milliun francs. Ina part da las interpresas han stuì pajar be ina part dal chasti u insumma nagin chasti, perquai ch'ellas han cooperà cun la WEKO.

Ulteriuras sancziuns en l'entir chantun

Questas sancziuns èn però be il cumenzament da las inquisiziuns che marschan il mument en il Grischun. La primavaira e la stad vul la WEKO communitgar las sancziuns che pertutgan la branscha en l'entir chantun. La dimensiun da quellas vegn ad esser marcant pli gronda che quella dal cas actual.


Or dal archiv

RR novitads 08:00+