Up-cycling, vul dir duvrar rauba veglia, existenta e cumbinar quella cun parts novas, è ina da las devisas da la nova gestiun da la Wega. Quest concept s’haja dà tranter auter er causa il budget limità, ha declerà la futura manadra da gestiun, Martina Tonidandel.
5 plazzas da lavur
2,5 plazzas da lavur vegnian occupadas dad anteriurs collavuraturs. En tut quint'ins dad avair 5 plazzas cumplainas per manar la libraria cun part da papetaria. Da la partida è actualmain er anc Philipp Guyer, l’anteriur manader da gestiun da la WEGA. El figurescha sco persuna da referenza per la surdada.
Acziun da pumpiers
Ch’ins ha chattà ina soluziun da successiun per la WEGA suenter ch’igl era enconuschent che quella serra sias portas, saja stà per ils blers ina gronda surpraisa, era per Philipp Guyer e sia famiglia ch' èn en possess da la chasa da la WEGA entamez San Murezzan. D’engraziar quai saja surtut a l’anteriur manader da la libraria, Hanspeter Achtnich. El haja tratg ils fils e contactà la chasa editura Baeschlin e Schuler.
Memia tard per quest onn
Malgrà che l’avegnir da la WEGA è stà be in curt temp intschert, han plirs clients da la libraria gì da reagir a temp ed empustar en auters lieus il material. Per exempel la scola da San Murezzan. Tenor infurmaziuns da la co-manadra da scola, Barbara Camichel, sa tracti mintg’onn d’imports da plirs 10’000 francs. La scola haja empustà per il proxim onn scolastic il material tar la libraria Schocher a Puntraschigna.
Senza sustegn na vai betg
Sche las cundiziuns ch’ils novs manaders da gestiun da la WEGA constattan per la scola, saja quella en mintga cas pronta da resguardar er en avegnir la libraria en vischnanca, ha suttastritgà la co-manadra da scola da San Murezzan. Per avair success, dovri dentant il sustegn da tuts. Tant ils indigens sco er ils giasts durant la stagiun auta duain trair a niz la purschida da la libraria. Quella vul er porscher bain svelt la pussaivladad d’empustar rauba via internet.
RR actualitad 17:00