Votaziun davart «Serletta Süd» pudess daventar stretga

Las sairas d’infurmaziun da las dus gruppas d’interess pertutgant il project «Serletta Süd» han gieu lieu il medem di, cun in’ura e mez differenza da temp. Tactica dal cumbat da votaziun ni casualitad? Tenor ils organisaturs casualitad. Els concedan però che quai dat in gust amar a tut.

Laschar ir video «Project «Serletta Süd»: cumbat per l'attenziun da la populaziun»

Project «Serletta Süd»: cumbat per l'attenziun da la populaziun

2:50 min, Actualitad video dals 23.9.2015

En il hotel Kulm sco era suenter en l’hotel Laudinella eran preschentas radund 250 persunas. Ins ha dentant vesì che las opiniuns èn per gronda part fatgas. Surtut tar l’infurmaziun dals promoturs na han ins udì paucas dumondas, i ha dà nagina discussiun. Anticipadamain, tar ils adversaris dal project «Serletta Süd» hai da dapli discussiuns, la saira era pli dinamica.

Arguments èn restads ils medems

Arguments per ni cunter il project han ins udì nagins novs. Per ils adversaris è l'hotel in coloss, bler massa grond che piglia tut la vista e destruescha uschè il caracter dal lieu.

Sala da mangiar hotel Kulm

Legenda da maletgs: La sala da mangiar en l'hotel Kulm era bain visitada. Passa 200 persunas eran preschentas RTR/V.Rominger

Per ils promoturs ed iniziants dal project è cler - quai è ina nova schanza per San Murezzan, per la regiun. In hotel da sanadad avra novas portas, porscha plazzas da lavur da tut onn e dat surtut era a la clinica Gut la schanza da restar a San Murezzan.

La clinica Gut tschertga dapi 13 onns in lieu per ina nova clinica.