Siglir tar il cuntegn
cuntegn

Engiadina Vischnancas burgaisas cuntentas cun proposta da revisiun

L'Associaziun grischuna da vischnancas burgaisas na vesa betg puncts problematics tar la proposta per la revisiun totala da la lescha davart il dretg burgais. Il Cussegl grond tracta la revisiun l'emna proxima.

Theo Haas
Legenda: Theo Haas, il president da l'Associaziun grischuna da vischnancas burgaisas RTR/David Spinnler

L'Associaziun grischuna da vischnancas burgaisas spetga cun calma las tractativas dal Cussegl grond per reveder la lescha davart il dretg burgais. Tenor il president da l'associaziun grischuna Theo Haas èn ins cuntent cun ils detagls, sco per exempel cun la proposta che insatgi sto viver 5 onns en ina vischnanca avant che pudair dumandar il dretg da burgais. L'Associaziun ha punctuà durant sia radunanza generala a Scuol che las vischnancas burgaisas hajan era en avegnir ina funcziun impurtanta. Per exempel cun sustegnair projects ch'ina vischnanca politica na possia betg sustegnair.

Admoniziun da la regenza

La presidenta da la regenza grischuna Barbara Janom Steiner ha ditg en ses pled durant la radunanza da las vischnancas burgaisas che quellas stoppian esser prontas da respunder dumondas fundamentalas. Per exempel la dumonda tgenina plivalur ch'ina vischnanca burgaisa possia avair. U era la dumonda co tractar en avegnir la facultad da las vischnancas burgaisas. I na saja betg gist da reagir cun critica sin talas dumondas, ins stoppia discutar questas dumondas sin basa da fatgs.

RR actualitad 17:00