Siglir tar il cuntegn
cuntegn

Engiadina Vischnanca da Madulain vul investir en nov restaurant

La pli pitschna vischnanca en Engiadin’Ota vul realisar per 1,7 milliuns francs in nov restaurant a l’entrada da Madulain. Per fabritgar enturn l’emprim plaun dal lavuratori communal en in’ustaria dovri il consentiment dal suveran da Madulain.

Legenda: Guardar il video Plans concrets per restaurant Surova Madulain. Durada 03:09 minutas.
Or da Actualitad video dals 25.04.2016.

Previs è in restaurant cun radund 90 plazs ed ina terrassa dador l’edifizi existent. Per realisar il project dovri dentant anc in permiss dal chantun per in midament da zona.

Ina lezia communala?

Sco ch’il president communal da Madulain, Roberto Zanetti ha declerà, saja il basegn d'in’ustaria en vischnanca grond. Sche la finanziaziun d’in restaurant tutga dentant er tar las lezias d’ina vischnanca politica, possian ins metter en dumonda. Dentant hajan ins er da valitar la plivalur d’in nov lieu d’inscunter per indigens e giasts.

A medem mument realisass la vischnanca gist er in local per la tschendra dal stgaudament che è gia situà en las localitads da l’ufficina communala. Premissa è uss in gea da la radunanza communala da Madulain, ils 27 d’avrigl 2016.