Siglir tar il cuntegn
Inhalt

San Murezzan 2017 Vignettas da transit duain gidar a diminuir colonnas sin via

Durant las duas emnas dals Campiunadis mundials da skis 2017 a San Murezzan spetgan ils organisaturs fin 150’000 aspectaturs che vegnan en l’Engiadina a guardar las cursas. Als indigens, ch'han be da passar San Murezzan, recumonda la polizia da montar ina vignetta da transit sin l’auto.

Legende: Video Concept da traffic CM San Murezzan abspielen. Laufzeit 00:14 Minuten.
Or da RTR dals 02.02.2017.

Plirs millis da tatgaders sajan gia scumpartids ha declerà Patrik Eichholzer da la polizia communala da San Murezzan. Las vignettas oranschas na sajan betg obligatoricas, ma ellas faciliteschian dentant il transit tras San Murezzan durant las proximas duas emnas.

Legende: Video Il conzept da traffic CM San Murezzan abspielen. Laufzeit 02:28 Minuten.
Or da RTR dals 02.02.2017.

Dus parcadis sco lieu da partenza

Per reglar il traffic datti ils dus posts da controlla a Schlarigna ed a Champfèr, nua ch’ils autos vegnan sviads directamain sin ils gronds parcadis. La glieud vegn transportada da là cun bus da shuttle a San Murezzan e fin sin l’areal da Salastrains.

5 zonas d’access per il center

Il concept da traffic da l’organisaziun da las cursas prevesa ultra da quai 5 zonas per la vischnanca da San Murezzan. A maun da las singulas vignettas da differentas colurs vesan ils posts da controlla tgi che ha nua access. Las persunas ch’abitan u lavuran a San Murezzan ed han in parcadi reservà, han survegnì ina vignetta speziala.

Lubientscha temporara per cas urgents

Per avair access en il center da San Murezzan er durant las proximas duas emnas, dovria ina permissiun speziala. Per cas urgents, uschia Patrik Eichholzer, dettia ina lubientscha temporara ch’ils posts da controlla pon dar sin il lieu.

Quai valia er per persunas che ston ir urgentamain en la Clinica Gut che sa chatta entamez San Murezzan. Senza lubientscha n'èsi dentant betg pussaivel da charrar cun vehichels motorisads tras las zonas serradas da San Murezzan.

Patrik Eichholzer da la polizia communala da San Murezzan.
Legenda: Patrik Eichholzer da la polizia communala da San Murezzan. RTR, Anna Caprez

Sin il palpiri funcziuna il concept

Entant exista il concept da traffic dals Campiunadis mundials da skis 2017 a San Murezzan be sin palpiri. A partir da sonda, 4 da favrer 2017 valan tut las restricziuns per il traffic.

Quint cun pli lungs viadis da lavur e cun colonnas hajan ins da far en mintga cas. Perquai recumondan tant ils organisaturs sco er la polizia da duvrar sche pussaivel ils mezs da transport publics.

RR actualitad 12:00