Viagiar en Engiadina cun Angelika Overath

Il pli nov cudesch dad Angelika Overath è in guid turistic per scuvrir l’Engiadina. L’autura che stat dapi 10 onns a Sent preschenta sut il titel «Gebrauchsanweisung für das Engadin» ina pluna muments or da ses mintgadi.

Putret dad Angelika Overath.

Legenda da maletgs: Angelika Overath. mad

Il cudesch è però dapli che mo ina simpla instrucziun da diever. Ils singuls chapitels ch’èn ordinads tenor l’alfabet portan titels che fan tschaffen da leger: Allegra, Cumün, Heu, Jagd, La Naiv, Plain in Pigna, Verrechnen o Ziegen. Co ch'ils titels mussan, è il rumantsch fitg preschent en il cudesch.

En il chapitel «Quatter jà quatter» descriva Angelika Overath la relaziun dals Engiadinais cun lur auto e la moda dad ir plain temperament. En Plain in Pigna vegnin nus a savair co che la scriventa Rut Plouda prepara questa spezialitad engiadinaisa. Sut il chavazzin Fluors fa Angelika Overath ina glista da tut las flurs da prà che vegnan avant en Engiadina, dus paginas che paran bunamain ina poesia.

RTR/ek