I tuna bain bel, dentant co la Val Müstair vul realisar quella visiun da daventar persistentamain il pli attractiv lieu da natira e d’abitar en las Alps, è il mument tut auter che cler. «Nus sviluppain quai ussa per l'avegnir ed i vegn ad ir pass per pass», manegia il president communal Rico Lamprecht.
Dal tuttafatg serius cun daventar il lieu il pli attractiv en las alps n’è quai dentant betg manegià, sco la suprastanta Gabriella Binkert Becchetti lascha sentir. «Jau pens ch’ins sto adina avair ina finamira pli auta, che quai ch’ins crai da pudair realisar.» I dettia bain blers auters bellezza lieus - cunzunt en il Grischun. Dentant la Val Müstair saja en in lieu uschè quiet, uschè davent da tut, ch’ins stoppia nizzegiar quai ussa positiv, e betg dir ch’ins saja a la fin dal mund.
Perquai vul la suprastanza da Val Müstair tranter auter er animar la populaziun da s’integrar pli fitg en quest process da sviluppar vinavant la vischnanca ed il parc da natira, la Biosfera Val Müstair. Sch’ins veglia avair success, lura stoppian ins far quai communablamain: «Sche tuts van en la medema direcziun, lura cuntanschain nus era las finamiras», concluda il president Rico Lamprecht.
Emprim resultat da l’analisa
La visiun «Val Müstair 2025» è in emprim resultat da l'analisa che la vischnanca ha laschà far dad ina firma externa per guardar nua ch’ils problems ed era las fermezzas da la vischnanca, dal parc da natira e da la vallada sco entir sistem èn.
Uschia che Rico Lamprecht ha era survegnì emprimas respostas or da l’analisa da las bun 40 intervistas fatgas, tge che n’ha betg funcziunà uschè bain en vischnanca: per exempel ch'i manca ina clera posiziun, in profil u insumma ina strategia da la Val Müstair, che las structuras en vischnanca ed en il turissem èn ineffizientas e betg adina cleras, ch'i n' è er betg cler, tge rolla ch'il parc da natira «Biosfera Val Müstair» gioga propi u era che la communicaziun è insuffizienta.
«Biosfera Val Müstair» è intschert
E perquai vul la vischnanca sco ina da sias emprimas mesiras, empruvar d'infurmar e communitgar meglier en l’avegnir: quai tant en Val Müstair, sco era anorvers. In auter punct ch’è era gia clers or da l'analisa, è ch'il parc da natira vegn era en l’avegnir a giugar ina rolla centrala per il svilup da la val. Sch'il parc vegn dentant anc adina ad avair num «Biosfera Val Müstair», lascha Rico Lamprecht anc avert. Quai saja era ina dumonda d'identificaziun. Pussibel saja era ch'el haja lura num da nov «Val Müstair - Parc da natira». Val Müstair fiss lura la marca ed il parc ina part da la Val Müstair.
La lavur cumenza pir ussa
La lavur sco tala entschaivia dentant per ussa, cun avair l'analisa dals problems e da las fermezzas da la Val Müstair sin maisa, constatescha il president communal. Il proxim mez onn vegnia la suprastanza ad elavurar ensemen cun gruppas da lavur in plan da master ed uschia sviluppar pli concret la visiun «Val Müstair 2025».
Cun las gruppas da lavur vul la suprastanza vegnir pli datiers da la populaziun ed uschia era sviluppar chausas che constattan per tuts. Che quai è era in desideri da la populaziun, gliez senta Rico Lamprecht vid il resun dals dumandads.
Plan da master fin l'atun 2017
La vischnanca ha ussa ina giada instradà in process cun la finamira da sviluppar in plan da master cun concrets champs d’acziun e mesiras per il svilup da la vallada sco era dal parc da natira Bisofera Val Müstair. Pli concret co i va vinavant cun la Val Müstair e ses parc, duessi lura vegnir quest atun, cura ch’il plan da master vegn preschentà a la populaziun
La populaziun reagescha cun bainvulientscha
La populaziun da la Val Müstair ha pudì s'infurmar durant ina radunanza communala davart la nova visiun e dal fatg che il parc da natira Biosfera Val Müstair duai restar in element central en Val Müstair. Las reacziuns èn stadas per gronda part bainvulentas. Ins saja cuntent che la Biosfera survegnia in nov schlantsch e che la Val Müstair possia sa profilar da nov. Dentant: tuts, era la suprastanza communala san che i dat anc fitg blera lavur per concretisar la visiun da restar in parc da natira e da daventar il pli bel lieu natiral en las alps.
Tge è capità fin ussa
RR actualitad 07:00
