Siglir tar il cuntegn

Header

cuntegn

Engiadina Val Müstair ha tuttina anc la schanza da salvar label da l'UNESCO

Sco quai che Christian Fanzun, president communal da Scuol ha infurmà a la radunanza communala dad ier glindesdi saira, vulan Scuol e la Val Müstair pruvar enseman da salvar il label da Biosfera Val Müstair Parc Naziunal da l’UNESCO. Quai cun far ina correctura dal contract da cooperaziun.

Biosfera senza label

Avrir la box Serrar la box

Dapi il 2010 ha la Val Müstair il label da l'UNESCO Biosfera Val Müstair Parc Naziunal. Gia dapi lura eri dentant enconuschent che la zona da tgira enturn il Parc sto vegnir engrondida. A la solaziun elavurada dal cussegl da Biosfera e las vischnancas pertutgadas (Val Müstair, S-chanf, Zernez e Scuol) han Zernez e S-chanf dentant ditg na.

Sco quai che Christian Fanzun ha ditg envers RTR, han els survegnì in onn dapli temp da l’UNESCO per reglar tut: quai senza garanzia che Paris dia alura era gea. Damai enfin l’atun 2016.

Anc ina giada laschar vuschar

Era il BAFU ed il chantun sustegnian la via da la Val Müstair e Scuol. Scuol vul cunquai anc ina giada laschar vuschar en chaussa.

Christian Fanzun è persvadì che quai è in duair da la vischnanca, cunquai che 70% da la populaziun da Scuol avevan ditg gea al contract da cooperaziun Biosfera Val Müstair Parc Naziunal.

Mo Sent serra cun in deficit

Plinavant ha la radunanza communala da Scuol approvà ils rendaquints 2014 da tut las 6 vischnancas che furman uss la vischnanca fusiunada da Scuol. Mo Sent serra cun in deficit da 139’000 francs.

Era in credit da 333'000 francs per realisar ina nova fermativa da bus en vischnanca è vegni approvà. Quai suenter lungas discussiuns. Questa fermativa duess remplazzar ina actuala che vala sco malsegira.

Artitgels legids il pli savens