Siglir tar il cuntegn

Engiadina Ussa tuttina: Puntraschigna lubescha ruta dal «Irontrail»

Ils curriders e las curridras dal Swiss Alpine Irontrail dastgan ussa tuttina currer il tschancun sper la chamona da Segantini vi. La suprastanza da Puntraschigna ha revedì sia decisiun da l'entschatta da mars.

chamona segantini
Legenda: Ils atlets pon tuttina currer sin il tschancun sper la chamona Segantini. RTR, Anna Caprez

Il Swiss Alpine Irontrail a Puntraschigna po ussa tuttina vegnir organisà sin il tschancun pretendì sur la chamonna da Segantini. Quai almain durant ina fin d'emna. La suprastanza communala ha revedì sia decisiun da l'entschatta mars. Lura aveva ella refusà la lubientscha per tema da conflicts tranter ils participants da la cursa ed ils viandants.

La raschun per la midada d'opiniun saja ch'i dettia marcantamain damain partenzas per la fin d'emna dals 21 da fanadur. Per l'event principal, ch'è in'emna pli tard, ha la suprastanza approvà ina proposta alternativa.

Puntraschigna na conservescha nagina naiv pli

Ultra da quai ha la suprastanza da Puntraschigna communitgà d'avair interrutt il manaschi da tests per conservar la naiv sur la stad. Durant la projectar las lavurs saja sa mussà, ch'i dettia exact sut il depot da naiv planisà ina lingia d'aua da 100 onns che stoppia vegnir remplazzada.

Sinaquai saja l'emprova da snowfarming vegnida interrutta. L'onn che vegn dettia però ina nova emprova.

RR novitads 08:00