Siglir tar il cuntegn
cuntegn

Engiadina Ussa piglian ils responsabels per il CSI posiziun

La societad «CSI San Murezzan» che ha organisà ils davos trais onns l’occurrenza da sigl cun chavals, ha problems finanzials. Ils responsabels piglian posiziun, suenter che la federaziun svizra ha stritgà il proxim CSI a San Murezzan.

in sigl tut sulet
Legenda: Per raschuns finanzialas è il CSI San Murezzan 2018 stritgà. RTR, Telesguard

Avant dus dis ha la Federaziun svizra da sport da chavals dà enconuschent ch'ella haja stritgà il turnier internaziunal da 5 stailas a San Murezzan. Els n'hajan betg pajà la taxa da 30'000 francs. Ussa piglia l'organisaziun dal «CSI San Murezzan» posiziun. Ils problems sajan finanzials. La presidenta Leta Joos conferma che plirs auter quints sajan averts.

Memia pauc sustegn haja manà en la misera finanziala

Sper ils custs supplementars per l’infrastructura, n'hajan singuls supporters betg tegnì lur empermischiun ed anc betg pajà, ha respundì Leta Joos al schurnal regiunal dad SRF. Ed ella concluda ch'i na saja betg pussaivel d'organisar in eveniment uschè grond en l'Engiadina senza ina garanzia da deficit da chantun e vischnancas.

L'uniun deplorescha, ma sto desister questa stad

Las prescripziuns dal maun public ed ils sponsurs pli e pli rars hajan manà il CSI da San Murezzan a ses cunfins finanzials. Uschia deplorescha ella suenter trais ediziuns dal CSI internaziunal a San Murezzan da stuair desister dal quel questa stad. L'Engiadina perdia uschia ina attracziun che pudessia vitalisar il turissem da stad.

RR novitads 16:00