Siglir tar il cuntegn
Inhalt

Engiadina Urs è da viadi en l’Engiadina Bassa - il luf en Val Müstair

En l’Engiadina Bassa datti probabel puspè in urs. Uschia quinta la surveglianza da chatscha che las duas nursas mazzadas en la Val S-charl èn vegnidas l’unfrenda d’in urs. En la Val Müstair datiers da l'alp da Buffalora è plinavant vegnì observà in luf .

Maletg simbolic: L'urs obersvà ad Eriz en il chantun da Berna.
Legenda: Maletg simbolic: Nua che l'urs sa chatta il mument n'è betg cler. L'ultim urs (maletg) han ins observà ad Eriz en il chantun da Berna. Keystone

In luf en vischinanza da l’alp Buffalora

In giast ha danovmain observà in luf en la vischinanza da l'alp Buffalora. En las regiuns tranter Zernez, Parc Naziunal e la Val Müstair han ins adina puspè pudì observar il luf. Sch'i sa tracta tar quest luf dal F18 n'è betg enconuschent. A maun da las fotografias provian ins da chattar ora quai, uschia il guardiaselvaschina Jon Gross da la Val Müstair.

In urs en Val S-charl

En l’Engiadina Bassa datti probabel puspè in urs. La surveglianza da chatscha fa quint che las duas nursas mazzadas en la Val S-charl èn daventadas l’unfrenda d’in urs. Las nursas eran en ina muntanera survegliada d’in chaun da protecziun. L'inspectur da chatscha chantunal Georg Brosi ha confermà ina annunzia da l’Uniun per la protecziun dals animals sin pradas en regiuns ruralas.

Nua che l’urs sa chatta il mument n’è betg enconuschent. En ina notg po in urs viandar 30 fin 40 kilometers uschia ch’el po uss esser dapertut.

Mesiras supplementaras na dovri betg

Il mument na dovria naginas mesiras supplementaras en quest connex, ha ditg Brosi. Il pastur en la Val S-charl sco era la vischnanca da Scuol hajan experientschas cun urs e sappian tge ch’i saja da far. Gia dapi 10 onns datti adina puspè urs en la regiun.

Urs en il chantun Berna n’è betg il medem

Per il parsura da l'Uffizi da chatscha e pestga na datti nagin connex cun l’urs ch’è vegni observà l’ultim temp en il chantun Berna. Ina cumprova directa manchia però, ma en vista a las observaziuns saja quai da quintar ch'i sa tractia da dus differents animals.

RR novitads 17:00