Siglir tar il cuntegn

Engiadina Uniun dals Grischs duai reorganisar sias structuras

La societad activa per lingua e cultura rumantscha en l'Engiadina, Val Müstair e Bravuogn ha da schliar dus puncts centrals il proxim onn, las finanzas e la furma da l’organisaziun.

Chalender Ladin e la carta da legitimaziun 2018
Legenda: Chalender Ladin e la carta da legitimaziun 2018 RTR, A. Wieland
  • La suprastanza propona da separar la contribuziun annuala da la vendita dal Chalender Ladin.
  • Quai pretenda ina revisiun dals statuts
  • Ils commembers e las commembras decidan en ina votaziun consultativa.

Las structuras da l’Uniun dals Grischs sajan per part antiquadas, uschia il president da la societad Hermann Thom envers RTR. Surtut il fatg ch’ils commembers consistan da tut quels e quellas che han cumprà in Chalender Ladin, senza avair in’idea da lur nums, veglia la suprastanza midar en avegnir.

Separar commembranza da Chalender Ladin

A la radunanza generala propona la suprastanza perquai d'instradar ina revisiun da statuts per il proxim onn e dad incassar la contribuziun annuala en furma separada da la vendita dal Chalender Ladin.

Meglierar finanzas

Ultra da quellas novas entradas ha la societad er dad ir sur ils cudeschs a reguard la situaziun finanziala en general da l’Uniun dals Grischs, agiunta Hermann Thom.

Ils commembers da l’Uniun dals Grischs vegnan a decider en ina votaziun consultativa davart ils pass da restructuraziun da la societad.

La radunanza generala è la sonda, 21 d’avrigl 2018 a Samedan.

RR actualitad 12:00