Dapi ils 20 da favrer è il cas Edy davant la dretgira d'administraziun dal Grischun a Cuira. La Pro Natura ha inoltrà in recurs. Els èn cunter da montar Edy puspè a Salastrains. Plinavant haja la Pro Natura fatg cler ch'els vegnian a trair vinavant il cas fin davant il Tribunal federal en cas ch'il chantun dess la lubientscha. Lura fissi da quintar cun danovamain custs ed in cumbat davant dretgira che va sur onns.
Nagin deposit pli
Uss vegn la chaussa pli e pli stretga. La lubientscha da la vischnanca da San Murezzan per il deposit dad Edy curra giu. Quai munta ch'il chau dad Edy stuess chattar sin ils 15 d'october in nov deposit. Quai è collia cun novs custs per in nov deposit e cun custs da transport. Il rest dal corp dad Edy è vegnì dismess ils ultims dis.
La dumonda per ina lubientscha temporara da puspè montar il chau dad Edy a Salastrains ha la suprastanza communala refusà. L'enviern passà era quai anc stà pussaivel. L'Uniun ha perquai tschentà uss la dumonda dad anc ina giada considerar la dumonda.
Ultima schanza
Sche la decisiun da la vischnanca da San Murezzan resta tar il na vesa l'Uniun Save Edy la suletta schanza per spendrar Edy sch'in fan en u ordaifer l'Engiadina fiss pront da metter a disposiziun in lieu per metter il chau dad Edy.
