Uffants rampignan enfin tar las fanestras, pitgan sisur e disturban uschè ils curs ch'il «Center da Bainesser» porscha, curs sco Yoga, Qi Gong, Tai Chi e Kung Fu.
Tals disturbis èn daventads uschè gronds, che la vischnanca da Valsot ha stuì intervegnir en il conflict tranter il «Center da Bainesser» ed ils uffants da Tschlin.
Nagina scola – tuttina manaschi
Scola na vegn dapi onns betg pli dà en questas localitads, ma las societads culturalas sco la musica, il cor ed autras gruppas da sport han adina pudì trair a niz las localitads per agens basegns.
Center da Bainesser e las uniuns culturalas èn s'arranschadas
Dapi ch'il «Center da Bainesser» sa chatta en las localitads han las societads stuì adattar lur program e tschertgar ina collavuraziun. Betg tuts avevan plaschair, ma ussa funcziuna quai. Da far in contract era cun ils uffants fiss exagerà, ma chattar ina schliaziun per ch'omadus dastgan viver e lavurar in dasper l’auter è stà necessari.
La vischnanca da Valsot ha appellà en il «Fegl uffizial» ch’els speran sin l’encletga dals uffants ed era dals geniturs. N’avess la collavuraziun betg da funcziunar en avegnir è la vischnanca sfurzada da scumandar l’access enturn la chasa da scola veglia a Tschlin.
RR actualitad 12:00