Siglir tar il cuntegn
cuntegn

Engiadina Tut sut controlla a la cuppa mundiala da Polo a San Murezzan

La vetta da glatsch sin il lai da San Murezzan e grossa avunda, la surfatscha da l’areal per giugar polo è cuvernada cun naiv fatga cun chanuns ed il dispositiv da segirtad è pront.

polo
Legenda: Il gieu da polo è svelt ed attractiv. mad

Durant trais dis han las squadras exclusivas da polo cumbattì per puncts sin il lai schelà da San Murezzan. Per ch’ils chavals na sa fan betg mal sin la vetta da glatsch, han ils organisaturs dal turnier producì naiv cun chanuns e garantì uschè per la segirtad d'uman ed animal.

Fasa da consolidaziun

Reto Gaudenzi, il fundatur dal turnier da polo a San Murezzan, ha dapi dus onns puspè sez en maun l’organisaziun e presidiescha il «Snow Polo World Cup St. Moritz». Tenor el èn tant il turnier da polo sco er las cursas da chavals che seguan las proximas trais fin d’emnas arrivads ad in punct, nua ch’ins haja da consolidar e tut tenor concentrar anc meglier ils dis exclusivs sin il lai schelà.

Tut sut controlla

Sin ina surfatscha da bun 800 meters quadrats han ins realisà in pitschen cuminet sin il lai da San Murezzan, cun pliras tendas exclusivamain avertas per ils giasts envidads.

La vetta da glatsch cun passa 40 cm è tenor Reto Gaudenzi grossa avunda e buna da purtar il pais da 360 tonnas. Investì hajan ins er en il dispositiv da segirtad, per evitar attatgas ed accidents pussaivels.