Radund in quart dapli persunas han visità la segunda conferenza da sanadad en Engiadina. Cun preschentaziuns e discussiuns da podium han differents referents mussà las pussaivladads per realisar in tal project en ina regiun turistica.
Chantun porscha maun
Tenor il cusseglier guvernativ Christian Rathgeb, ha il chantun Grischun las meglras premissas per realisar projects en connex cun il turissem da sanadad. Dentant dovri uss ina collavuraziun stretga tranter ils differents vecturs: turissem, medicina e destinaziun, per insumma instradar in tal project. A partir da l’october 2016 uschè il Rathgeb, vegn instradà ina gruppa da lavur che la regenza ha definì per sviluppar projects e strategias per promover offertas novas.
Regiuns han dentant d’agir
La gruppa da lavur che vegn presidiada da Philipp Gunzinger, na saja dentant betg prevesida per realisar ils projects. Questa lezia sto vegnir fatga en mintga singula regiun. La gruppa duai elavurar entaifer ils proxims mais la basa fundamentala per instradar projects novs en connex cun il turissem da sandad.
Betg finamira per Grischun Vacanzas
Er Martin Vincenz, il CEO da Grischun vacanzas, vesa in grond potenzial tar il turissem da sanadad. Dentant betg sco nov posiziunament per Grischun Vacanzas, mabai sco nov martgà pussaivel per singulas regiuns.
RR actualitad 17:00