Siglir tar il cuntegn
Inhalt

Engiadina Tura sin Arpiglia è tradiziun il venderdi sontg

Per numerus commembers dal Club da skiunzs Zuoz è la data avant Pasca adina reservada per in’excursiun en cumpagnia sin l’Alp Arpiglia e pli tard sin in dils pizs en vischinanza.

Legende: Audio Ludwig Denoth e la tradiziun da Pasca abspielen. Laufzeit 02:56 Minuten.
02:56 min, Actualitad dals 29.03.2018.

Entant ch’ils skiunzs pli vegls termineschian per solit lur excursiun sin l'Alp Arpiglia, nua ch’i vegn er preparà il tradiziunal risotto, cuntinueschan ils auters lur tura fin sin il Piz Utèr u sin il Piz Arpiglia. Tge ruta ch'els piglian decidan ils responsabels adina avantlieu tut tenor las relaziuns, ha declerà Ludwig Denoth. El maina tras las turas dal Club da skiunzs dapi decennis.

Tradiziun en cumpagnia

Dapi plirs decennis furma l’excursiun sin Arpiglia in termin fix en l’agenda dal Club da skiunzs da Zuoz e quai tradiziunalmain adina il venderdi sontg. Per blers saja perquai exclus d'ir davent sur ils dis da Pasca, ha il skiunz passiunà da S-chanf agiuntà.

Il venderdi sontg è per mai adina stà sontg!
Autur: Ludwig Denothcommember d'onur club da skiunzs Zuoz

E sche las cundiziuns n’han betg permiss d'ir cun skis da tura sin l’alp Arpiglia, lura èn ils commembers er ids a pe sin la muntogna. Quai è per exempel stà il cas l'onn passà, cura ch’els han perfin pudì duvrar la via champestra libra per lur spassegiada.

Il star da cumpagnia stettia quel di en il center. E las numerusas risadas ed uras cun chant ed allegria restian a la fin dal di a tuts en buna regurdientscha. Il return a chasa na saja dentant betg adina stà simpel, ha Ludwig Denoth manegià cun in rir en fatscha.

RR actualitad 17:00