Er en il mund da passlung è corona omnipreschent. Gist per l’organisaziun dal Tour de ski che ha lieu en differents pajais ina gronda sfida d’organisaziun. Uschia n’ha nagin pudì arrivar a Tschierv senz'avair fatg in test da PCR. Ed avant da pudair passar il cunfin vers l’Italia ha alura mintgin da far in test spert d’antigen. Tenor Sandra Spitz, la coordinatura d’eveniments da passlung, datti total var 500 tests durant ils trais dis en Val Müstair.
Installà center da test
A Tschierv è vegnì installà in center da test enturn la chasa da scola. Là vegnan testadas tut las persunas da las singulas «Bubbles». Ord motivs da segirezza per las passlunghistas ed ils passlunghists è il post da testar dador la scola.
Suenter ch’ils atlets e las atletas survegnan lura il resultat pon els, en il cas che quel è negativ, viagiar sur cunfin en l’Italia per sa preparar per las proximas etappas. En cas d’in resultat positiv vegn fatg in test da PCR, ed alura procedì tenor quest resultat. En mintga cas na po nagin passar il cunfin senza in test da corona negativ.