Suenter las navaglias fin giufuns las valladas l’entschatta da november eran ils turistichers optimistics. Quel optimissem è però be restà be in curt mument. Las temperaturas èn creschidas cun il favugn a partir da glindesdi e la gronda part da la naiv è svanida fin sin radund 2’000 meters sur mar.
Las loipas da passlung en ils funs da las vals han patì dal favugn. Bleras regiuns da passlung avevan gia cumenzà a far naiv artifiziala per las loipas. Ils deposits da naiv artifiziala èn crudads ensemen uschua ch'igl è mo pli restà pitschens munts da naiv.
Per la gronda part da las loipas saja però quella sperdita bain supportabla. Opticamain para la sperdita da naiv pli gronda che quai ch’ella saja, uschia ils responsabels. A Tschierv discurr’ins d’ina sperdita da la naiv artifiziala da 10 fin 15% (ca. 3’000 meters cubics), a Zernez fin 20% ed en la Plaiv da maximalmain 5%.
Ristga calculada
Cun quai saja da far quint sch’ins fetschia naiv artifiziala gia l'october e november, uschia ils responsabels. I saja adina da far quint cun fasas pli lungas da favugn.
Lur cletg è ch’els avevan anc la naiv sin gronds deposits cur ch'il favugn è vegnì. Ils deposits èn daventads pli pitschens dentant senza perder blera naiv. La naiv saja dentant daventada pli cumpacta, declera il responsabel da Zernez Alfred Barbüda.
Main fortuna han gì regiuns ch'avevan gia scumpartì la naiv dals deposits sin las loipas. Ftan ha entras quai pers fin 40% da la naiv producida artifizialmain, quai èn radund 1’600 meters cubics. Era per els è il donn supportabel. Ils custs effectivs per in meter cubic naiv artifiziala na saja betg simpel da calcular. Daniel Pitsch il responsabel a Tschierv calculescha cun radund dus francs per cubic. Uschia vess il favugn maglià radund 6’000 francs a Tschierv e 3’200 a Ftan.
Nagin privel per la stagiun
Tuttas regiuns dumandadas deploreschan la sperdita da naiv entras il favugn. Per il mument na saja quai però nagin privel per la stagiun d’enviern. Segund els po la situaziun sa midar aifer paucs dis, saja quai cun naiv or d’ils chanuns u giu da tschiel. I dovria simplamain temperaturas pli bassas e quellas sajan en vista tenor las prognosas da Meteo Svizra.
