Per far recloma per vacanzas da stad en Grischun vul l’organisaziun chantunala da marketing Grischun Vacanzas danovamain far diever da la forza da derasaziun da l’internet. Acziuns da recloma creativas dessan chattar resun en il mund virtual e daventar uschia in tema en la populaziun. La campagna da questa stà duai avair lieu a Tschlin.
Premi per cloms da telefons na respundids
L’attracziun da Tschlin duai esser la quietezza. Per mussar quella prevesa Grischun Vacanzas d’installar ina cabina da telefon amez la vischnanca. Tgi che ha interess po telefonar, tgi che ha interess po respunder.
Ils indigens han la pussibilità da far recloma per lur regiun tut tenor agen gust.
Sche nagin prenda giu il telefon entaifer in temp definì, vegn il clom svià tar Grischun l’organisaziun turistica. Il fat, che nagin ha respundì al telefon, vegn onurà cun in premi. L’acziun dura bundant in’emna e duai provocar tant in eco en il mund virtual sco era en las medias convenziunalas.
Obermutten e Vrin èn ids ordavant cun bun exempel
En l’emprima acziun da quest gener aveva Obermutten fatg l’onn 2011 dad amis da la plattafurma virtuala Facebook amis reals, che han silsuenter visità la vischnanca.Per in mument era Obermutten in dals lieus pli enconuschents en Svizra.
L’onn 2015 ha Grischun Vacanzas drizzà il focus sin Vrin. Or da la staziun principala da Turitg pudevan ils passants dar ina baterlada cun in actur, che seseva cun ses laptop amez in prà da flurs en Val Lumnezia. In u l’auter dals passants aveva survegnì ina carta dal di per visitar sez il prà da flurs.
Il principi da la stad èn ils da Tschlin londervi
A Tschlin vul Grischun Vacanzas includer la populaziun indigena in lur acziun. Durant bundant in’emna duajan ils da Tschlin surprender, da s’organisar cun il telefon amez la vischnanca. Ils turistichers èn da buna speranza ch’ils da Tschlin porschan maun per l’idea, che duai vegnir realisada il principi da la stad.
RR novitads 20:00