La decisiun, che la regiun Engiadina Bassa / Val Müstair na sa participescha betg a l'augment da chapital da l'Institut Otalpin a Ftan, è crudada als 4 da matg. Co che Rico Kienz, manader da gestiun da la regiun, scriva en la communicaziun, na veglia la regiun betg star en pe a gronds investiders privats. Sche las vischnancas sa participassan a l'augment fissan ellas suenter puspè en possess da 40% da las aczias. Quai pudess tegnair davent investiders gronds privats.
Populaziun duai purtar l'IOF
En pli duai l’Institut Otalpin Ftan vegnir purtà dad ina vasta part da la populaziun da la regiun. Che quai è il cas, haja sa mussà gia en las 1’500 suttascripziuns, che l’iniziativa «Salvai l’IOF» aveva pudì rimnar.
Politica haja gia investì 6 milliuns francs e vul investir vinavant
La politica da la regiun haja sustegnì l’Institut a Ftan fin da qua gia cun bundant 6 milliuns francs e veglia sustegnair el er vinavant. Uschia na vesia la conferenza da presidents n’er betg in motiv cunter ina nova cunvegna da prestaziun u da prolungar quella existenta. La dumonda stoppia dentant vegnir da l'Institut Otalpin, scriva la conferenza da presidents.
RR novitads 12:00