Siglir tar il cuntegn
cuntegn

Engiadina Success per la Viafier retica durant CM San Murezzan

La Viafier retica ha durant ils Campiunadis mundials da skis dals 6 fin ils 19 da favrer a San Murezzan transportà quatter giadas dapli passagiers che normal. Quai tenor ina communicaziun da la Viafier retica.

Nov sistem da check-in è sa cumprovà.
Legenda: Nov sistem da check-in è sa cumprovà. MAD

La sonda e la dumengia dals 11 ed ils 12 da favrer ha la Viafier retica transportà cun 14’500 respectiv 12’500 ils blers passagiers durant l’occurrenza sportiva. En tut èn viagiads quels dis dals Campiunadis mundials 84’000 persunas cun la Viafier retica a San Murezzan respectivamain partì da San Murezzan. Quai munta en media 7’000 persunas a di.

Check-in sa cumprovà

Per organisar l'arrivada e la partenza dals fans da skis ha la Viafier retica prendì il medem sistem da check-in sco gia tar la Festa federala da jodladers l’onn 2014. E quest sistem è sa cumprovà era per ils Campiunadis mundials da skis.

Tgi che vuleva viagiar da Cuira u da Landquart a San Murezzan, ha obtegnì dals collavuraturs da la Viafier retica in bigliet da reservaziun. A mintga passagier è lura era gist vegnì assegnà in tren. Quests bigliets èn era vegnids scumpartids en ils trens spezials da Turitg e Son Gagl. Blers passagiers han ludà quest sistem.

RR actualitad 12:00