Siglir tar il cuntegn
cuntegn

Engiadina Substanzas nuschaivlas en il Spöl

Sut il mir da fermada Punt dal Gall han ins chattà substanzas nuschaivlas en il flum Spöl.

Legenda: Guardar il video L'aua en il Spöl è contaminada cun PCB. Durada 02:40 minutas.
Or da Telesguard dals 04.11.2016.

La Polizia chantunala communitgescha ch'ins haja chattà ina contaminaziun da l'aua cun substanzas nuschaivlas en il Spöl sut il mir da fermada a Punt dal Gall. I sa tracta da biphenils policlorads (PCB). In labor spezialisà haja fatg provas e constatà valurs pli autas da PCB. Tenor spezialists da l'Uffizi per l'ambient grischun na datti betg privels immediats per fauna e flora.

Connex cun lavurs da revisiun?

La fin da settember saja arrivà PCB en furma da pulvra durant lavurs da revisiun en l'intern dal mir da fermada a Punt dal Gall, scriva la polizia. Quai durant lavurs da sablunadi. Per controllas sche las substanzas nuschaivlas n'èn betg arrivadas en il Spöl, hajan ins dapi lura adina puspè prendì provas d'aua. Mardi passà han ins constatà las valurs pli autas da PCB en l'aua dal Spöl. L'Uffizi per l'ambient grischun fa ussa in’analisa pli profunda da la situaziun per examinar sch’i na dettia betg donns a lunga vista.

OEE vulan prender mesiras necessarias

Las Ouvras Electricas d'Engiadina OEE han annunzià sez il cas a la polizia. Il directur da las OEE Michael Roth ha ditg che las OEE culan examinar pertge che il PCB è arrivà en il flum e tge mesiras ch'ins sto realisar per evitar quai en avegnir.

RR novitads 09:00

Tge è PCB?

Tge è PCB?
Legenda: Material contaminà cun PCB sto vegnir dismess en ina deponia per ruments spezials Keystone

PCB è in chlorid organic che vegniva duvrà sco isolaziun en condensaturs, transfurmaturs, ieli idraulic, colurs ni collas.Tenor l’uffizi federal per sanadad, tutga PCB tar las substanzas nuschaivlas persistentas. La Svizra è sa obligada d'identifitgar nua che PCB vegn avant ed eliminar quest. L'onn 1986 hai dat in scumond general per PCB.