Siglir tar il cuntegn
Inhalt

Engiadina Sto «Bumanns Chesa Pirani» a La Punt serrar las portas?

Sco quai che la famiglia Bumann communitgescha via medias socialas stoppian els forsa bandunar la Chesa Pirani a La Punt sin la fin avrigl 2017. Quai suenter 22 onns da gestiun.

La raschun è tenor la famiglia Bumann che la possessura da la Chesa Pirani, la Chesa Pirani SA, vul vender tut il stabiliment. In cumprader na datti pel mument anc betg, uschia ch’ins na sappia betg dir in tge furma che la chasa vegnia manada enavant e sch’in restaurant in quella furma é era prevesì en futur, ha ditg Ingrid Bumann sin dumonda da Radiotelevisiun Svizra Rumantscha.

Motivs econimics

Motiv per la vendita è tenor Marc Wieser, il president dal cussegl administrativ da la Chesa Pirani SA, la situaziun economica.

Il contract da fittanza han ils Bumanns desditg da sai or sin la fin d'avrigl 2017. Sche i dat enfin lura ina soluziun che pussibilitescha in avegnir dal restaurant da gourmet en la Chesa Pirani n’è oz betg cler. Sche in nov possessur faschess ina bun'offerta ad els, uschè Ingrid Bumann, fissan els pronts da restar e manar vinavant il restaurant da gourmet.

Finamira dal cussegl administrativ

Quai è era la finamira dal cussegl administrativ, numnadamain ch'in restaurant d'auta classa vegn mantegnì, uschè il president Marc Wieser envers RTR. Els hajan sapientivamain scrit ora il restaurant per vender. Vegn quai betg ad esser pussaivel stoppia il cussegl administrativ dentant reagir la fin da quest onn e vender las localitads cun in'autra utilisaziun.

L’inserat per vender la Chesa Pirani è publitgà sin ina plattafurma dad immobiglias en l’internet. Per tge summa ch'ella vegn vendida, na vuleva Marc Wieser betg dir.

Legende: Video Premi Milestone per Daniel ed Ingrid Bumann abspielen. Laufzeit 02:18 Minuten.
Or da RTR dals 02.11.2004.