Siglir tar il cuntegn
Inhalt

Engiadina Stalla ad Isola dat vinavant da discutar

La Pro Lej da Segl vegn a cumbatter vinavant la stalla. Ina gestiun da tut onn na fetschia betg senn ad Isola, ha ditg Jost Falett president da la Pro Lej da Segl, a chaschun da la radunanza generala. E per ina gestiun da stad na dovri betg in nova stalla.

Isola da stad
Legenda: Da l'otra vart, a la fin da la vischnanca fiss la nova stalla planisada RTR/ A.Caprez

Quest fanadur han la famiglia Cadurisch, che vul bajegiar ina nova stalla, e la vischnanca Bregaglia retratg il recurs ch’els avevan fatg encunter la decisiun da l’uffizi chantunal per il svilup dal territori. Quel aveva decis il favrer da quest onn che la stalla na possia betg vegnir construida, cunquai ch’ella violeschia la zona per la protecziun da la natira e cuntrada.

Maisa radunda als 16 settember

La Pro Lej da Segl vegn a tegnair ferm vi da sia posiziun, ha ditg Jost Falett. L’influenza sin la cuntrada ed il squitsch sin l’ecologia saja massa grond. Da quel avis eran tut ils uffizis d’ambient schon tar l’emprima visita oculara l’onn 2009. Ils patruns da construcziun dentant han persequità vinavant il project enfin tar il recurs encunter l’uffizi chantunal l’onn 2014. Quest han els ussa retratg cun l’idea da chattar ina soluziun cuminaivla a favur dal project.