Siglir tar il cuntegn

Header

audio
Hockey 3. Liga: gieus d'amicizia
Or da Actualitad dals 27.12.2021.
laschar ir. Durada: 3 minutas 29 Secundas.
cuntegn

Stagiun da hockey interrutta En il Grischun dal Sid rudla il puck tuttina

Curt avant Nadal è vegnì interrut il campiunadi da hockey sin glatsch per las ligas pli bassas. Pertutgadas èn las squadras da l'emprima fin la quarta liga ed era la liga naziunala D da las dunnas. La decisiun vala er per tut las partiziuns da juniors fin tar las equipas dad U17.

Squadras dal Grischun dal Sid han chattà alternativa

Gieus d’amicizia èn però vinavant lubids. Perquai èn ils presidents da las squadras da la terza liga dal Grischun dal Sid sa mess ensemen ed han decis da giugar tut ils gieus sco previs – però sco gieus d’amicizia. En la gruppa 2 giogan las otg squadras tuttas sut tschiel avert e betg en ina halla. E quai numnadamain ad: Alvra, Bergiaglia, Silvaplauna, Schlarigna, Samedan, La Plaiv, Zernez e Poschiavo.

Il giavisch da nus tuts è da pudair giugar gieus da hockey. Perquai avain nus decis tuts ensemen da giugar gieus d’amicizia.
Autur: Cla Duri Cuorad president EHC Zernez

Resguardar prescripziuns

Avant, durant e suenter las partidas che vegnan giugadas sco gieus d’amicizia, vegnian resguardas tut las mesiras da protecziun en connex cun corona. Quai ha confermà Linard Weisstanner, il president dal HC Schlarigna. Uschia vala l’obligatori da mascrina en las cabinas, ils giugadurs ston tegnair distanza e desister dal salid tradiziunal senza guants suenter la partida.

Arbiters er da la partida

Las squadras pon annunziar ils gieus tar la federaziun da hockey. Quella metta a disposiziun er per ils matschs d’amicizia arbiters. Vinavant valan er per mintga gieu las licenzas ed in rapport uffizial dal gieu, precis sco tar in gieu da campiunadi. Uschia pon vegnir giugads ils matschs sco usità, simplamain cun resguardar tut las reglas da corona. Ils resultats da las partidas vegnan publitgads sin Instagram.

Ils 27 da schaner 2022 duai il campiunadi da hockey en terza liga puspè cuntinuar per tuts.

RTR actualitad 17:00

Artitgels legids il pli savens