Siglir tar il cuntegn
cuntegn

Engiadina Spöl gia dapi decennis contaminà cun PCB

Sco quai che retschertgas da RTR han mussà, han ins en connex cun las analisas per decider co allontanar il PCB ord il Spöl, constatà che 83% da quel era gia en il terren avant l'incap.

Legenda: Guardar il video Spöl gia dapi decennis contaminà cun PCB. Durada 03:47 minutas.
Or da Telesguard dals 19.03.2018.

L'emprima dumonda era: Co sanar il Spöl ch' è vegnì contaminà da PCB durant lavurs da revisiun il 2016 en l'intern dal mir da fermada Punt dal Gall. Durant quellas analisas la stad passada han ins constatà ch'il PCB è enfin 50 centimeters profund en il terren. Sulet cun las revisiuns menziunadas vess ins stuì chattar PCB mo enfin 10 centimeters profund en il terren.

83% dal PCB era gia existent

Il terren dal letg dal flum è contaminà sin ina profunditad da 50 centimeters ed er la riva è contaminada. Quai èn ils indizis che conferman ch' il PCB era existent gia avant las lavurs da revisiun, uschia fa a savair l'Uffizi da natira ed ambient dal chantun Grischun.

Cun questa conclusiun èn ussa pliras dumondas sin maisa:

  • Tgi è insumma culpabel - las Ouvras electricas d'Engiadina sezzas ubain firmas che han fatg en il passà lavurs da mantegniment a basa d'incumbensa da las ovras electricas?
  • Tgi ha da surpigliar ils custs da sanaziun che vegnan stimads sin radund 14 milliuns francs?
  • È il «cas Spöl» unic o sa chatta PCB era en auters flums en il Grischun?

Questas dumondas restan actualmain dentant anc avertas. In tal cas n'hai anc betg dà en il Grischun. Ord quest motiv duai sco emprim ina giada vegnir schlià la basa legala en chaussa. Bain pussibel che quest cas duai alura vegnir tractà davant dretgira sco cas da precedenza. Cunzunt sch'ins vegnia a scuvrir ch'il «Cas Spöl» n'è betg unic.

Er quella dumonda duai vegnir sclerida. La fin da mars spetga il chantun dad avair ils emprims resultads e pudair respunder, sch'il «Cas Spöl» è il sulet cas.

PCB – Biphenils polichlorads

PCB – Biphenils polichlorads

PCB èn cumbinaziuns da clor toxicas che pon effectuar cancer. Fin ils onns 1980 èn questas vegnidas duvradas surtut en transfurmaturs ed implants electrics sco liquid idraulic, però er sco lomiaders en lacs e meds d’isolaziun. PCB tutga entant tar las 12 substanzas toxicas organicas ch'èn vegnidas scumandadas il 2001.

RR actualitad 11:00