Gia durant la cursa hajan ins badà, che la mesiraziun da temp na funcziunia endretg. Quai haja lura sa confermà cura che passa 100 reclamaziuns èn arrivadas tar il comitè d'organisaziun. Intgins atlets eran ellas falladas categorias, auters avevan in temp fallà ed anc auters n'eran insumma betg rangads.
La firma da mesirar il temp n'ha betg pudì tegnair si'impermischin
La firma da mesirar temp haja lura stizzà la glista en la rait ed empermess da curreger quella fin il glindesdi saira. Questa empermischun n'haja ella dentant betg pudì tegnair en.
Quai n’è natiralmain betg quai che nus avain spetgà.
Er ussa, in'emna suenter la cursa, èn 10 fin 20% dals resultads betg gists. Il capo dal comité d’organisaziun, Claudio Duschletta, na craja betg pli londervi, che la glista saja in bel di 100% cumpletta e correcta.
Empruvà da salvar la reputaziun da la cursa
A las radund 100 persunas, che han reclamà pervi da resultads betg corrects, ha Duschletta scrit enavos persunalmain per declerar la situaziun e sa stgisar. Ina tschinquantina haja respundì da maniera positiva ed annunzià da vulair prender part er il proxim onn puspè.
Proxima giada mesira in'autra firma il temp
Gia il di la cursa avevan decidì ils organisaturs da betg pli vulair lavurar cun questa firma da mesirar temp. Entant han els desditg il contract cun la firma ed er gia survegnì offertas dad autras firmas da prender temp. Quellas vegnan evaluadas en las proximas emnas.
Passa 2'200 participantas e participants avevan prendì part al 16avel Bike-Maraton enturn il Parc Naziunal Svizzer.
RR actualitad 06:20
