Siglir tar il cuntegn

Engiadina Serletta Sid: cumpromiss malgrà glisch verda dal chantun?

La regenza Grischuna ha approvà il project «Serletta Sid» a San Murezzan. Uschia èsi pussaivel da construir in nov hotel grond e la nova «Clinica Gut». Malgrà quai vulan ils responsabels tschertgar danovamain il discurs cun ils adversaris dal project.

Legende: Video «Serletta Sid» in pass plinavant abspielen. Laufzeit 1:10 Minuten.
Or da Actualitad video dals 05.05.2017.

La regenza ha refusà tut ils recurs da proprietaris d’immobiglias vischinas. Ord vista da la regenza pussibilitescha il project in ulteriur svilup d’auta qualitad per la vischnanca da San Murezzan.

L’interess public da realisar in nov cumplex da hotel e da clinica saja da valitar pli aut che l’interess da vischins privats, argumentescha la regenza. Entras ina cundiziun garantescha la regenza ch’ils cubus dals edifizis novs vegnan era duvrads sco hotel e clinica, sco quai ch'igl era vegnì accentuà avant la votaziun communala.

Las lavurs na cumenzan betg damaun

Per la projectaziun dal hotel nov e da la clinica nova na signifitga la lubientscha da Cuira dentant anc betg glisch verda, ha ditg il delegà dal cussegl administrativ da la Clinica Gut, Adrian Urfer. Ins veglia tschertgar ina meglra schliaziun.

La vista sin il lai da San Murezzan e la vischnanca.
Legenda: La vista sin il lai da San Murezzan e la vischnanca. mad

Adversaris betg cuntanschibels

Ils adversaris dal project «Serletta Sid» n’èn fin uss betg stads cuntanschibels. Sco quai che Heinz Hunkeler dal Kulmhotel San Murezzan aveva ditg l’atun passà ad RTR, sajan ins anc adina pront da chattar in cumpromiss. Sche lez na correspundia però betg als giavischs dals recurrents, sajan els pronts da trair vinavant il cas.

Contractivas cumplexas

Las contractivas sajan stadas lungas e fitg cumplexas, ed era tut las garanzias da procedura sajan vegnidas duvradas da las partidas, scriva la regenza grischuna.

L’october 2015 aveva il suveran da San Murezzan approvà il project per ina clinica ed in hotel cun 62% da las vuschs. Dus possessurs d’auters hotels aveva alura fatg recurs cunter il project perquai ch’els teman che la vista sin il lai da San Murezzan vegnia surbajegiada.

RR novitads 06:00