Siglir tar il cuntegn

Header

cuntegn

Engiadina Seria da cursas da passlung vegn lantschada a Puntraschigna

La vischnanca da Puntraschigna organisescha per l'emprima giada il prolog dal champiunadi da cursas da passlung sur lungas distanzas, il Visma Ski Classics. Quai en stretga collavuraziun cun ils organisaturs da «La Diagonela».

L’emprima cursa da la stagiun 2016/17 da la seria va sur ina lunghezza da 10 kilometers ed ha lieu ils 27 da november 2016. Suenter Puntraschigna suonda «La Sgambeda» a Livigno, il «Vasaloppet» en China, il «Kaiser Maximilian Lauf» a Seefeld en Austria ed ils 21 da schaner 2017 ha lieu per la 4. giada «La Diagonela» en l'Engiadina. Partenza ed arriv da la cursa sur 65 kilometers è Zuoz. Cun porscher ina cursa da passlung gia la fin da november, vulan ins er render attent sin la cumpetenza da naiv en l'Engiadina, ha declerà il manader da Puntraschigna Turissem, Jan Steiner.

In bun passlungist vegn furmà da stad

Per ils sportists che curran lungas distanzas è il trenament durant la stad il pli impurtant. Per porscher als atlets d’enviern era durant la stad ina cumpetiziun, datti quest onn per la segunda giada l’ediziun da stad da «La Diagonela».

La Diagonela Summer Race

A questa cursa che parta ils trais da settember a Zuoz e finescha suenter 14 km sin il pass da l’Alvra, pon sa mesirar sin skis a rodas tant ils sportist da massa sco er ils topatlets. Stgars 80 participants èn gia s'annunziads per la cursa che ha ina differenza d'autezza da 600 meters.

passlungists sin rodas a Zuoz
Legenda: Il cumenzament da la stagiun da passlung en Engiadina fa la cursa da stad Diagonela Summer Race. mad

Dario Cologna e Curdin Perl

Tranter las annunzias per la cursa da stad da La Diagonela èn passlungists da renum. Il davos mument s'annunzià è Dario Cologna, sco quai ch'il president da la Diagonela Ramun Ratti ha confermà. Da la partida èn era Curdin Perl da Puntraschigna e la victura dal Vasalauf Katerina Smutná. Durant la cursa è la via chantunala tranter Zuoz – La Punt – Pass da l’Alvra serrada per tut il traffic.

fh

Artitgels legids il pli savens