Siglir tar il cuntegn

Header

video
Sent: Dunna betg pli en privel da vita
Or da Telesguard dals 06.11.2018.
laschar ir. Durada: 2 minutas 10 Secundas.
cuntegn

Engiadina Sent: Dunna blessada grevamain betg pli en privel da vita

Suenter in'operaziun da pliras uras en l'Ospital chantunal a Cuira na saja ella betg pli en privel da vita. Quai ha confermà la Polizia chantunala. Er ils trais policists e las guardias da cunfin ospitalisads pervi dal suspect d'ina tissientada da fim han pudì bandunar l'ospital da Scuol.

L'incendi dad ina chasa a Sent il glindesdi suentermezdi stat effectivamain en connex cun in conflict da relaziun. La Polizia chantunala conferma en sia communicaziun la saira quai che differentas persunas sin il lieu avevan gia raquintà ad RTR.

Pervia dal privel da sballunada ha la polizia pir pudì entrar en la chasa il mardi, quai suenter ch'in spezialist da statica ha examinà la situaziun. Ils investigaders da fieu èn uss vid far lur lavur ed eruir la raschun dal brischament.

Quai ch'è succedì tenor la polizia

Il glindesdi curt avant las 13:00 haja il clom d'urgenza da la sanitad survegnì l'annunzia ch'ina dunna saja vegnida blessada a Sent. Curt suenter quel clom hajan ins pudì observà ch'igl ardeva tar la chasa da la dunna.

Entant eran arrivads in team d'ambulanza da l'ospital Scuol ed in helicopter da la Rega. Ensemen han els tgirà la dunna ferida, ch'è vegnida purtada lura suenter en l'Ospital chantunal a Cuira.

video
Delict da relaziun a Sent: Ina dunna blessada
Or da Giuventetgna dals 05.11.2018.
laschar ir. Durada: 56 Secundas.

Dunna smanatschada e ferida

Tenor las indicaziuns da la polizia haja quai dà ina dispita tranter l'um (60) e sia dunna (45). En il decurs da quella haja l'um ferì sia dunna grevamain cun in cuntè. Ella haja pudì mitschar cun feridas fitg privlusas ora sin via, nua ch'ina terza persuna ha gidà ad ella ed ha alarmà la sanitad.

Entant ha la polizia confermà che la dunna na saja betg pli en privel da vita. Quai suenter ch'ella saja vegnida operada pliras uras en l'Ospital chantunal a Cuira.

Chasa arsa.
Legenda: La chasa arsa a Sent. RTR, Georg Luzzi

Acziun da la polizia engrevgiada tras incendi

Pervi da l'incendi e pervi da las armas, che l'um aveva en chasa (tar l'um sa tracti dad in anteriur policist da la polizia chantunala), n'hajan ni ils pumpiers ni ils policists pudì s'approximar al lieu da l'incendi, nua che l'um era anc adina.

Curt suenter las 13:00 eran dad udir explosiuns ord la chasa. Curt avant las 14:00 saja lura l'um vegnì ord chasa ed haja pudì vegnir prendì en fermanza.

Ils pumpiers eran buns dad evitar che ulteriuras chasas piglian fieu ed han pudì stizzar il fieu il suentermezdi. Mintgamai trais collavuraturs dal corps da guardias da cunfins e da la polizia chantunala hajan stuì ir en l'ospital Scuol a sa laschar tractar pervi dad intoxicaziun da fim.

Entant ha la Polizia chantunala confermà ch'els hajan gia ier saira puspè pudì ir a chasa.

video
Sent – incendi cun drama da relaziun
Or da Telesguard dals 05.11.2018.
laschar ir. Durada: 2 minutas 14 Secundas.

Culpabel suspectà è in anteriur policist

Il culpabel suspectà saja in anteriur collavuratur da la Polizia chantunala. Pervi da las armas en chasa haja il lieu stuì vegnir serrà giu bain. La chasa è donnegiada, uschia ch'ella n'è betg pli abitabla.

La Polizia chantunala e la Procura publica grischuna hajan cumenzà dad investigar il cas, concluda la polizia sia communicaziun dal glindesdi saira.

RR novitads 15:00+

Artitgels legids il pli savens