Siglir tar il cuntegn

Header

cuntegn

Engiadina Segl di gea a la «Engiadina San Murezzan Turissem SA»

La radunanza communala ha ditg gea a la nova societad d'aczias che duai danov gestiunar l'organisaziun turistica en Engiadin'Ota.

La radunanza communala da Segl ha ditg gea cler e net cun 50 encunter 6 vuschs a la nova societad d'aczias che duai en avegnir gestiunar il turissem en Engiadin'Ota. La reorganisaziun da la destinaziun è necessaria pervi ch'il circul d'Engiadin'Ota ch'è fin uss purtader da la destinaziun vegn schlià. Perquai han proponì ils capos communals da l'Engiadin'Ota da fundar ina societad d'aczias purtada da las vischnancas. Ussa voteschan tut las vischnancas da l'Engiadin'Ota davart la fundaziun da questa nova societad d'aczias.

Betg grondas discussiuns

A Segl n'hai betg dà grondas discussiuns davart l'organisaziun nova. Ins sto dentant era savair, che Segl è ina da las vischnancas che profita fermamain da la nova clav da scumpart per finanziar la destinaziun. Nov duai pajar mintga vischnanca tenor abitants ch'ella ha e tenor la forza d'impostas, ma betg pli era tenor las pernottaziuns generadas.

Nova organisaziun porscha damain

La nova organisaziun turistica en Engiadin'Ota vegn a porscher damain che la destinaziun ch'è oz en funcziun. Il budget vegn ad esser tar bun 10 milliuns francs e betg pli tar radund 15 milliuns francs sco fin uss. Perquai porscha la nova destinaziun era damain: ils posts d'infurmaziun en las singulas vischnancas vegnan ad esser ina purschida opziunala che sto vegnir pajada extra. E per las occurrenzas turisticas en las vischnancas fiss responsabla en l'avegnir mintga vischnanca sezza. La nova destinaziun fiss en prima lingia responsabla per il marketing vers anora.

audio
Bunura: Segl di gea a nova organisaziun turistica
ord Actualitad dals 26.02.2016.
laschar ir. Durada: 2 minutas 26 Secundas.

Durant ils proxims mais ston era tut tschellas vischnancas da l'Engiadin'Ota vuschar davart la nova societad d'aczias per l'organisaziun turistica. Quella vegn be fundada sche tut las vischnancas da l'Engiadin'Ota din gea.

Artitgels legids il pli savens