La proposta ch'è vegnida preschentada oz mesemna duai en il meglier cas metter fin ad ina dispita che dura gia dus onns. Dapi il 2017 discuta numnadamain l'Engiadin'Ota co reorganisar il provediment da sanadad.
Cumenzà ha tut l'istorgia in december 2017. Il cussegl cirquital Engiadin'Ota aveva decis quella giada da transfurmar l’ospital Samedan e la Chasa da tgira Promulins en la fundaziun Provediment da sanadad Engiadin'Ota.
Il crap da stgarpitsch: ils statuts da l'organisaziun nova
Ils statuts, che furmavan la basa da la nova organisaziun giuridica dal provediment da sanadad, apunta da la fundaziun, èn vegnids suttamess ad ina votaziun dal pievel e vegnids acceptads.
Curt suenter han cumenzà las discussiuns. La raschun per quellas: Ils statuts da la fundaziun sajan vegnids midads suenter la votaziun uschia ch'els na correspundian betg pli a la voluntad dal pievel.
Da la discussiun a la dispita giuridica
La discussiun è platgada l'onn passà sco dispita giuridica avant dretgira: Cunter ils statuts novs han la suprastanza communala da San Murezzan e differentas persunas privatas inoltrà il schaner 2018 in recurs tar la Dretgira administrativa dal Chantun Grischun.
L'adattaziun giavischada è uss sin maisa
La fundaziun ha adattà ils statuts e ses cussegl da fundaziun ha acceptà els en sia sesida dals 4 d'avrigl. Questa decisiun ha il cussegl da fundaziun dal Provediment da sanadad Engiadin'Ota u per tudestg «Stiftung Gesundheitsversorgung Oberengadin SGO» publitgà oz mesemna.
En la communicaziun a las medias fa il cussegl a savair ch'ils statuts adattads regleschan da nov la structura dal cussegl, il temp d’uffizi ed er la furma d’eleger ils cussegl.
Emprima reacziun dals recurrents
Cun avair acceptà l'adattaziun dals statuts e dad in reglament d'organisaziun saja uss il cussegl da fundaziun da buna speranza che «nagut n'impedeschia pli ils recurrents privats e la vischnanca da San Murezzan da retrair lur recurs».
Quels hajan gia signalisà dad esser pronts da far quai, scriva il cussegl da fundaziun en sia communicaziun.
Payer succeda Ratti
Cun quai ch'i saja uss reussì da far la midada da las structuras cirquitalas tar la fundaziun haja er annunzià Gian Duri Ratti da sa retrair sco president dal cussegl administrativ, scriva il cussegl da furmaziun en sia communicaziun.
Sco nova presidenta dal cussegl administrativ è vegnida tschernida Gabriela Payer.
RR novitads 12:00