Siglir tar il cuntegn
Inhalt

Engiadina Scuol stat davos il Chastè da Tarasp

Il suveran da Scuol ha approvà cun 586 cunter 259 vuschs la cunvegna da prestaziun che regla l’access public dal Chastè da Tarasp fin ils 31 da december 2030. La vischnanca da Scuol sa participescha vi dals custs da mantegniment e da gestiun cun maximalmain 200'000 francs l’onn.

La Fundaziun Chastè da Tarasp vegn a manar la gestiun dal chastè.
Legenda: La Fundaziun Chastè da Tarasp vegn a manar la gestiun dal chastè. Keystone

Plinavant survegn la vischnanca il dretg da precumpra a pretsch limità che dura fin ils 31 da fanadur 2040. Premissa è dentant ch’il artist Not Vital cumpra uss er il Chastè da Tarasp da la famiglia von Hessen per 8 milliuns francs.

Tenor il president communala da Scuol, Christian Fanzun sajan las tractativas sin buna via. La populaziun da Scuol haja realisà che questa soluziun è stada ina da las ultimas per evitar che l’edifizi istoric daventia in object per speculaziuns.

Not Vital vul cumprar il Chastè da Tarasp e duvrar el per exposiziuns d’art da renum internaziunal.

Cler gea era al BES

A la votaziun a l’urna han ils votants da Scuol er ditg gea al nov contract da cunvegna cun il Bogn Engiadina Scuol. Quel ha uss dapli libertads da manar la gestiun. La vischnanca paja in import fix dad 1,85 milliuns francs per ils proxims 5 onns.

Il contract dispitaivel cun la polizia chantunala ha il suveran da Scuol er approvà cleramain cun 560 cunter 262 vuschs. A partir dal prim da schaner 2016 èn en vigur er ils novs statuts da la regiun d’Engiadina Bassa / Val Müstair ed ils statuts da la Corporaziun Energia Engiadina.